جیو انٹرٹینمنٹ کے سپرہٹ ڈرامہ ’تیرے بن‘ کے مداحوں کی نظریں اس کے دوسرے حصے پر لگی ہوئی ہیں۔ مداح یہ جاننے کے لیے بیتاب ہیں کہ ’تیرے بن 2‘ کب آن ایئر ہوگا، اور آخر اس میں تاخیر کی اصل وجہ کیا ہے۔
یاد رہے کہ 2023ء میں یمنیٰ زیدی اور وہاج علی کے ہمراہ اس ڈرامے کے سیزن 2 کا باضابطہ اعلان کیا گیا تھا، لیکن تاحال اس حوالے سے کوئی واضح پیش رفت سامنے نہیں آئی، جس کے باعث شائقین مسلسل سوالات اٹھا رہے ہیں۔
حال ہی میں امریکا میں ایک تقریب کے دوران مداحوں نے اداکارہ یمنیٰ زیدی سے براہِ راست یہ سوال کیا، جس پر انہوں نے تاخیر کی وجہ بیان کرتے ہوئے کہا کہ میرے خیال میں یہ اعلان کچھ جلد بازی میں کر دیا گیا تھا۔
یمنیٰ زیدی نے واضح کیا کہ اس پروجیکٹ میں تاخیر کی ذمہ داری صرف پروڈیوسرز پر نہیں بلکہ فنکاروں پر بھی عائد ہوتی ہے۔ انہوں نے کہا کہ مداح سیزن 2 کی توقع رکھ سکتے ہیں، لیکن فی الحال اس پر کام جاری ہے اور میرے پاس اس حوالے سے کوئی تازہ معلومات نہیں ہیں۔
