تونسہ کے مقام سے گزرنے والا دریا سندھ کا طاقتور سیلابی ریلا ڈیرہ غازی خان کی حدود میں داخل ہو گیا ہے، جس پر ضلعی انتظامیہ نے ہنگامی صورتحال کا الرٹ جاری کر دیا ہے۔
ادھر جھنگ میں دریائے چناب میں شدید طغیانی کے باعث دس سے زائد دیہات زیرِ آب آ گئے، جہاں پانی نے رہائشی علاقوں اور فصلوں کو اپنی لپیٹ میں لے لیا ہے۔ رابطے کی کئی سڑکیں بھی پانی میں ڈوب چکی ہیں، جس سے آمد و رفت میں مشکلات درپیش ہیں۔ راجن پور کے مختلف علاقوں میں فصلوں کو نمایاں نقصان پہنچا ہے۔
اسی طرح حافظ آباد میں بھی دریائے چناب کے کنارے تیزی سے کٹاؤ جاری ہے، جس کی وجہ سے متعدد دیہات کی سیکڑوں ایکڑ زرعی زمین دریا برد ہو چکی ہے۔
حکام نے لوگوں کو احتیاطی تدابیر اختیار کرنے اور محفوظ مقامات کی طرف منتقل ہونے کی ہدایت کی ہے۔
