جنوب مغربی جرمنی میں ٹرین حادثہ

جنوب مغربی جرمنی میں ایک افسوسناک واقعے میں ٹرین پٹری سے اتر گئی، جس کے نتیجے میں کم از کم تین افراد اپنی جان سے ہاتھ دھو بیٹھے جبکہ متعدد شدید زخمی ہوگئے۔

بین الاقوامی خبر رساں اداروں کے مطابق یہ حادثہ شہر اسٹٹگارٹ کے قریب پیش آیا۔ ٹرین آپریٹرز کا کہنا ہے کہ حادثے کی اصل وجہ تاحال معلوم نہیں ہو سکی ہے۔

اطلاعات کے مطابق، حادثے کے وقت ٹرین میں تقریباً 100 مسافر سوار تھے۔ جاں بحق اور زخمی افراد کو قریبی اسپتالوں میں منتقل کیا جا رہا ہے۔

جرمن حکام نے حادثے میں کئی افراد کے زخمی ہونے کی تصدیق کی ہے اور بتایا ہے کہ واقعے کی مکمل تحقیقات کا آغاز کر دیا گیا ہے۔

علاقے سے موصول ہونے والی معلومات کے مطابق حادثے سے کچھ دیر پہلے وہاں شدید طوفان آیا تھا، اور جائے وقوعہ پر درخت بھی گرے ہوئے پائے گئے ہیں، جو ممکنہ طور پر حادثے کا سبب بن سکتے ہیں۔