گلگت بلتستان میں شدید بارشوں کے باعث بابوسر ٹاپ کے قریب سیلابی ریلے میں بہہ جانے والے افراد میں ایک نجی ٹی وی چینل خیبر نیوز کی اینکر پرسن شبانہ لیاقت بھی شامل ہیں، جو اپنے شوہر اور تین بچوں کے ہمراہ لاپتہ ہو گئی ہیں۔
حکومتی ترجمان فیض اللہ کے مطابق، متاثرہ اینکر شبانہ لیاقت اور ان کے اہل خانہ کے بارے میں اطلاع ان کے رشتہ داروں نے صوبائی حکام کو دی، جس پر فوری طور پر تلاش کا عمل شروع کیا گیا۔ اطلاعات کے مطابق، شبانہ لیاقت، ان کے شوہر لیاقت، اور تین بچے بابوسر روڈ پر سفر کے دوران سیلابی پانی کی زد میں آ کر لاپتہ ہو گئے۔
عینی شاہدین کے مطابق، بابوسر کے علاقے میں 10 سے 15 سیاح سیلابی ریلے کی لپیٹ میں آئے۔ اب تک ریسکیو کارروائیوں کے دوران سات لاشیں نکالی جا چکی ہیں، جب کہ باقی لاپتہ افراد کی تلاش جاری ہے۔
ریسکیو مشن میں مقامی پولیس، انتظامیہ، گلگت بلتستان ڈیزاسٹر مینجمنٹ اتھارٹی، ریسکیو 1122، پاک فوج، اور جی بی سکاؤٹس شریک ہیں، جب کہ سرچ آپریشن میں ڈرونز اور سراغ رساں کتوں کی بھی مدد لی جا رہی ہے۔























