پاکستان کی قومی ایئر لائن، پی آئی اے نے اربعین کے موقع پر زائرین کی سہولت کے لیے خصوصی پروازوں کے شیڈول کا اعلان کر دیا ہے۔ ترجمان کے مطابق یہ پروازیں 8 اگست سے 11 اگست تک پاکستان سے نجف کے لیے روانہ ہوں گی، جب کہ واپسی کی پروازیں 18 اگست سے 23 اگست تک نجف سے پاکستان کے لیے چلائی جائیں گی۔ تمام پروازوں کے ٹکٹس کی فروخت شروع کر دی گئی ہے، اور طلب میں اضافے کی صورت میں مزید پروازیں شامل کی جائیں گی۔ فی مسافر کرایہ 675 ڈالر مقرر کیا گیا ہے۔ تاہم، زائرین نے پی آئی اے سے کرایے میں کمی اور پروازوں میں اضافے کی درخواست کی ہے۔
واضح رہے کہ ہر سال لاکھوں زائرین ایران کے راستے سڑک کے ذریعے عراق کا سفر کرتے ہیں، لیکن رواں سال وفاقی حکومت نے سیکیورٹی وجوہات کی بنا پر اس روٹ کو بند رکھنے کا فیصلہ کیا ہے۔ وزیر داخلہ سید محسن نقوی نے بتایا کہ وزارت خارجہ، بلوچستان حکومت اور سیکیورٹی اداروں کی مشاورت سے فیصلہ کیا گیا ہے کہ اس سال زائرین صرف ہوائی راستے سے عراق جا سکیں گے۔
اس فیصلے کی روشنی میں وزیر اعظم شہباز شریف نے وزیر ہوابازی کو ہدایت کی ہے کہ زائرین کے لیے ہوائی سفر کو زیادہ سے زیادہ آسان بنایا جائے اور اضافی پروازوں کا انتظام کیا جائے۔ اس سلسلے میں وزیر داخلہ نے وزیر اعظم سے ملاقات کر کے اربعین پالیسی پر بریفنگ دی، جس میں گوادر سیف سٹی منصوبے اور بلوچستان کی سیکیورٹی صورتحال پر بھی تبادلہ خیال کیا گیا۔
