اسلام آباد فوڈ اتھارٹی نے ایک بڑی کارروائی کرتے ہوئے ترنول کے قریب سے 50 سے زائد زندہ گدھے اور تقریباً 25 من گدھے کا گوشت برآمد کرلیا، جو مقامی ہوٹلوں کو فراہم کیا جا رہا تھا۔ کارروائی کے دوران ایک غیر ملکی شہری کو بھی حراست میں لیا گیا۔
ڈائریکٹر فوڈ اتھارٹی کی ہدایت پر اس واقعے میں ملوث افراد کے خلاف قانونی کارروائی شروع کردی گئی ہے۔ ڈپٹی ڈائریکٹر فوڈ اتھارٹی کے مطابق یہ تحقیقات جاری ہیں کہ گدھے کا گوشت کن ہوٹلوں یا علاقوں میں سپلائی کیا گیا۔
پولیس نے موقع پر موجود غیر ملکی کو اپنی تحویل میں لے لیا ہے، جب کہ حکام اس بات کی بھی چھان بین کر رہے ہیں کہ آیا یہ گوشت غیر ملکی باشندوں کے استعمال کے لیے رکھا گیا تھا یا نہیں۔
فوڈ اتھارٹی نے برآمد شدہ گوشت کو فوری طور پر تلف کر دیا ہے اور تمام ذمہ داروں کے خلاف مقدمہ درج کرنے کی ہدایت جاری کردی گئی ہے۔
