پنجاب میں پیر سے بارشوں کا سلسلہ دوبارہ شروع ہونے کا امکان ہے، جس کے پیش نظر پی ڈی ایم اے پنجاب نے اپنا پانچواں اسپیل الرٹ جاری کیا ہے۔
پی ڈی ایم اے کے ترجمان کے مطابق، 28 سے 31 جولائی کے درمیان زیادہ تر اضلاع میں بارشوں کا امکان ہے۔ مون سون کی ہواؤں کی وجہ سے اسلام آباد، پنجاب، خیبرپختونخوا، کشمیر اور گلگت بلتستان کے مختلف علاقوں میں کہیں کہیں موسلادھار بارش متوقع ہے۔
ترجمان نے بتایا کہ مری، گلیات، اٹک، چکوال، جہلم، منڈی بہاوالدین، گجرات، گجرانوالہ اور حافظ آباد میں بھی بارش کی پیشگوئی کی گئی ہے۔
اسی طرح لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، چنیوٹ، فیصل آباد اور اوکاڑہ میں بھی بارش ہو سکتی ہے۔
مزید برآں، 29 جولائی سے ڈیرہ غازی خان، بھکر، بہاولپور، خانیوال، پاکپتن، وہاڑی، لودھراں، مظفرگڑھ اور راجن پور میں بھی بارشوں کی توقع کی جا رہی ہے۔
