وادی کاغان میں جھیل سیف الملوک جانے والی سڑک پر اچانک کلاؤڈ برسٹ کے نتیجے میں لینڈ سلائیڈنگ کا واقعہ پیش آیا، جس کی وجہ سے 117 جیپوں میں سوار 500 سے زائد سیاح پھنس گئے۔ واقعے کی اطلاع ملتے ہی کاغان ڈویلپمنٹ اتھارٹی نے فوری کارروائی کرتے ہوئے ریسکیو آپریشن کا آغاز کیا اور تمام سیاحوں کو بحفاظت نکال کر محفوظ مقامات پر منتقل کر دیا۔
وزیراعلیٰ خیبرپختونخوا، علی امین گنڈا پور نے واقعے کا نوٹس لیتے ہوئے فوری امدادی کارروائیاں شروع کرنے کی ہدایت جاری کی۔ انجینئرنگ ون ٹیم نے بھاری مشینری کی مدد سے متاثرہ سڑک سے ملبہ ہٹا کر ٹریفک کی روانی بحال کر دی، اور راستے میں رکی ہوئی جیپوں کو بحفاظت باہر نکالا گیا۔
سیکرٹری سیاحت عبدالصمد نے کہا کہ خیبرپختونخوا حکومت سیاحوں کی سلامتی کو اولین ترجیح دیتی ہے اور ہر ممکن اقدامات کیے جا رہے ہیں۔ انہوں نے سیاحوں سے اپیل کی کہ ہنگامی صورتحال میں فوری طور پر 1422 ہیلپ لائن پر رابطہ کریں۔
ریسکیو، ٹورازم پولیس اور کاغان ڈیولپمنٹ اتھارٹی کی مشترکہ کوششوں سے راستہ کھول دیا گیا ہے، جبکہ دوسری طرف بابوسر اور تھک کے علاقوں میں حالیہ سیلاب سے لاپتہ افراد کی تلاش کا سلسلہ تاحال جاری ہے۔
محکمہ موسمیات کے مطابق خیبرپختونخوا میں آئندہ 24 گھنٹوں کے دوران عمومی طور پر موسم گرم اور مرطوب رہنے کا امکان ہے، البتہ بالائی علاقوں میں گرج چمک کے ساتھ بارش متوقع ہے۔ دیر، سوات، بونیر، شانگلہ، کوہستان، مانسہرہ، ایبٹ آباد اور جنوبی وزیرستان جیسے علاقوں میں بارش کا امکان ظاہر کیا گیا ہے۔
گزشتہ روز نوشہرہ، ایبٹ آباد اور سوات میں بارش ریکارڈ کی گئی، جہاں چراٹ میں 9 ملی میٹر، کاکول میں 13 ملی میٹر اور کالام میں 3 ملی میٹر بارش ہوئی۔ موسم کا حال بتاتے ہوئے محکمہ موسمیات نے کہا کہ کراچی، کوئٹہ، اسلام آباد اور پشاور سمیت دیگر شہروں میں دن کے وقت گرمی اور حبس کا سلسلہ جاری رہے گا، جبکہ چترال، گلگت بلتستان، کشمیر اور دیر کے علاقوں میں گرج چمک کے ساتھ بارش کی پیش گوئی کی گئی ہے۔
