کاغان ڈیولپمنٹ اتھارٹی نے فوری کارروائی کرتے ہوئے 500 سے زائد سیاحوں کو محفوظ مقام پر منتقل کر دیا، جو جھیل سیف الملوک کی جانب جانے والے راستے میں پھنس گئے تھے۔ یہ صورتحال اس وقت پیش آئی جب اچانک کلاؤڈ برسٹ کے نتیجے میں لینڈ سلائیڈنگ ہوئی اور سڑک بند ہو گئی۔
محکمہ سیاحت و ثقافت خیبرپختونخوا کے سیکرٹری عبدالصمد کے مطابق، شدید بارش کے باعث ملبہ گرنے سے راستہ بند ہو گیا تھا۔ اس وقت 117 سے زائد جیپوں میں سوار سیاح علاقے میں محصور ہو گئے تھے۔
ریسکیو ٹیموں نے بھرپور اور بروقت کارروائی کرتے ہوئے تمام سیاحوں کو محفوظ طریقے سے نکال لیا۔ سیکرٹری سیاحت نے بتایا کہ خیبرپختونخوا حکومت سیاحوں کی جان و مال کی حفاظت کو سب سے زیادہ اہمیت دیتی ہے اور کسی بھی ہنگامی صورتحال میں فوری اقدامات کیے جاتے ہیں۔
انہوں نے مزید کہا کہ کسی بھی ہنگامی حالت میں فوری مدد کے لیے سیاح 1422 ہیلپ لائن پر رابطہ کریں تاکہ فوری تعاون فراہم کیا جا سکے۔
