پاکستان اسٹیٹ آئل (پی ایس او) نے خواتین کو با اختیار بنانے کے حوالے سے اپنے اہم پروگرام ”پی ایس او شاہین” کو کراچی کے بعد لاہور اور اسلام آباد میں بھی متعارف کرا دیا ہے، جہاں پہلے سے چار گنا زیادہ خواتین کو اس پروگرام میں شامل ہونے کا موقع فراہم کیا جائے گا۔پی ایس او کے شاہین پروگرام کا مقصد خواتین کو کار اور موٹرسائیکل چلانے کی تربیت دے کر انہیں خودمختار بنانا ہے۔
اس تربیتی پروگرام کی ابتدا سب سے پہلے کراچی سے ہوئی، اور پہلے مرحلے میں 82 فیصد خواتین نے ڈرائیونگ لائسنس اور تربیتی سرٹیفکیٹ حاصل کیے، جو شاہین پروگرام کی کامیابی کا ثبوت ہے۔
پی ایس او شاہین کا مقصد خواتین کو بااعتماد بنانا اور ان کی نقل و حرکت کو آسان بنانا ہے۔ پہلے مرحلے میں شامل کئی خواتین نے ڈرائیونگ کی تربیت حاصل کرتے ہوئے چھوٹے کاروبار شروع کیے اور اپنے خاندان کی کفالت میں اہم کردار ادا کیا، اور یہاں تک کہ اپنی ذاتی موٹرسائیکل بھی خریدنے میں کامیاب رہیں۔
یہ پروگرام تیزی سے ترقی کر رہا ہے اور پاکستان بھر کی خواتین کی زندگیوں میں مثبت تبدیلی لا رہا ہے، تاکہ ان میں خود اعتمادی میں اضافہ ہو اور وہ ذاتی اور پیشہ ورانہ ترقی کی راہ پر گامزن ہو سکیں۔
