سفارت خانہ پاکستان برن میں مینگو فیسٹیول کا شاندار انعقاد
پاکستانی آم کی خوشبو نے سوئٹزرلینڈ میں سب کو اپنے سحر میں جکڑ لیا
برن (نمائندہ خصوصی عمران مزمل کی رپورٹ) – سفارت خانہ پاکستان برن میں ایک شاندار مینگو فیسٹیول ایونٹ کا انعقاد کیا گیا جس میں پاکستانی کمیونٹی کے ساتھ ساتھ غیر ملکی مہمانوں نے بھی بڑی تعداد میں شرکت کی۔ اس ایونٹ کا مقصد پاکستان کے اعلیٰ معیار کے آموں کو عالمی سطح پر متعارف کرانا تھا۔
تقریب میں پاکستان سے لائے گئے مختلف اقسام کے آموں کو خوبصورتی سے پیش کیا گیا، جن میں سندھڑی، چونسہ، انور رٹول، لنگڑا اور دوسروں کی نمائش کی گئی۔ ایونٹ میں مہمانوں کو آم سے بنی مختلف اشیاء جیسے آم کا شربت، آم کی چٹنی، آم کی آئسکریم اور آم کے کیک بھی چکھائے گئے۔
سفیر پاکستان ڈاکٹر مرغوب سلیم بٹ نے اس موقع پر کہا کہ: “پاکستان کا آم نہ صرف ذائقے میں بے مثال ہے بلکہ یہ ہماری زراعت، ثقافت اور معیشت کا بھی ایک اہم جز ہے۔ اس فیسٹیول کے ذریعے ہم دنیا کو پاکستان کی مٹی کی مٹھاس سے روشناس کروانا چاہتے ہیں۔”
اس مینگو فیسٹیول سے جہاں غیر ملکیوں کو پاکستانی آم کی انفرادیت سے متعارف ہونے کا موقع ملا، وہیں یورپ میں موجود پاکستانی کاروباری افراد کو بھی آم کی برآمدات کے ذریعے تجارت کے نئے مواقع فراہم ہونے کی توقع ہے۔
ایونٹ کے آخر میں مہمانوں نے پاکستان کے آموں کو دنیا کے بہترین پھلوں میں شمار کرتے ہوئے سفارتخانے کی اس کاوش کو خوب سراہا۔
