وفاقی وزیر مواصلات عبدالعلیم خان نے نیشنل ہائی وے اتھارٹی (این ایچ اے) لاہور آفس کے دورے کے دوران ایک اعلیٰ سطحی اجلاس کی صدارت کی، جس میں مختلف ترقیاتی منصوبوں، نئے انٹرچینجز اور انفراسٹرکچر کی تعمیر سے متعلق اہم فیصلے کیے گئے۔ اجلاس میں وفاقی سیکرٹری مواصلات، چیئرمین این ایچ اے اور سی ای او رروڈا سمیت دیگر اعلیٰ حکام شریک تھے۔
عبدالعلیم خان نے ملتان روڈ پر جاری توسیعی اور تعمیراتی کاموں کا معائنہ کرتے ہوئے فوری بہتری کے احکامات جاری کیے۔ انہوں نے سینئر افسران کو ہدایت کی کہ ترقیاتی کاموں کی رفتار تیز کی جائے اور معیار پر کوئی سمجھوتہ نہ ہو۔ انہوں نے ہڈیارہ سے رنگ روڈ تک ملتان روڈ کو دلکش اور خوبصورت بنانے کی بھی ہدایت دی۔
اجلاس میں ایم ٹو موٹروے سے منسلک انٹرچینجز اور دیگر اہم تعمیراتی امور پر بھی تبادلہ خیال کیا گیا۔ عبدالعلیم خان کا کہنا تھا کہ لاہور، سیالکوٹ، کھاریاں اور اسلام آباد کے درمیان بننے والی نئی موٹروے اب 6 لین پر مشتمل ہو گی، جس سے اسلام آباد سے لاہور کا سفر 100 کلومیٹر کم اور دورانِ سفر تقریباً ایک گھنٹہ کم ہو جائے گا۔
انہوں نے یہ بھی واضح کیا کہ گوجرانوالہ، گجرات، کھاریاں، جہلم اور گوجرخان جیسے شہر اس منصوبے سے منسلک کیے جائیں گے۔ ان کا کہنا تھا کہ این ایچ اے کو مستقبل کی ضروریات کو مدِنظر رکھتے ہوئے کم از کم 30 سالہ پالیسی پر کام کرنا چاہیے اور تعمیراتی معیار پر کوئی سمجھوتہ نہ کیا جائے۔
وزیر مواصلات نے یہ ہدایت بھی جاری کی کہ ملتان روڈ سے رنگ روڈ تک جتنے بھی زیرِ التوا منصوبے ہیں، انہیں جلد از جلد مکمل کیا جائے تاکہ شہریوں کو بہتر سفری سہولیات فراہم کی جا سکیں۔
