واٹس ایپ، جو دنیا بھر میں سب سے زیادہ استعمال کی جانے والی ایپلی کیشنز میں شامل ہے، ایک نیا اور مفید فیچر متعارف کروا رہی ہے جو صارفین کے لیے گفتگو کو مزید آسان اور منظم بنائے گا۔
میٹا کی ملکیت اس میسجنگ ایپ میں اب صارفین کو یہ سہولت میسر ہوگی کہ وہ کسی بھی پیغام کا جواب تھریڈ کی شکل میں دے سکیں گے، بالکل ویسے ہی جیسے فیس بک یا ایکس (سابقہ ٹوئٹر) پر تبصروں کے جوابات ترتیب سے دکھائی دیتے ہیں۔
ابھی تک واٹس ایپ میں جوابات انفرادی طور پر نظر آتے ہیں، جس کی وجہ سے کسی پرانے جواب کو تلاش کرنا مشکل ہوتا ہے۔ لیکن اس نئے تھریڈنگ سسٹم کی بدولت، خاص طور پر گروپ چیٹس میں، ہر جواب اصل پیغام کے نیچے ایک سلسلہ وار ترتیب میں دکھائی دے گا، جس سے گفتگو کی سمت برقرار رہے گی اور بات چیت کا ربط قائم رہے گا۔
مزید یہ کہ جب کوئی صارف کسی میسج کا جواب دے گا تو اصل پیغام پر ایک چھوٹا سا آئیکون ظاہر ہوگا۔ اس آئیکون پر کلک کرنے سے اس پیغام سے متعلق تمام جوابات ایک ہی جگہ دکھائی دیں گے۔
اس تھریڈنگ فیچر سے صارفین ایک ہی موضوع پر ہونے والی گفتگو کو باآسانی فالو کر سکیں گے، اور اس مخصوص تھریڈ میں مزید جوابات بھی شامل کیے جا سکیں گے، جس سے طویل بات چیت بکھرنے کے بجائے ایک ہی جگہ مرکوز رہے گی۔
