کراچی کے مختلف علاقوں میں صبح سویرے بارش
کراچی کے مختلف علاقوں میں صبح سویرے بارش
شہر کے مختلف علاقوں میں صبح سویرے بارش ہوئی۔ ایئرپورٹ، ملیر، گلستان جوہر، اسکیم 33 ، گلشن اقبال، نارتھ کراچی اور نیوکراچی سمیت شہر میں بادل برسے۔
ادھر پنجاب میں طوفانی بارشوں اور سیلابی ریلوں کے بعد سندھ کے مختلف شہروں میں بارشیں ہوئیں۔ محکمہ موسمیات نے آج کراچی میں بارش کی پیش گوئی کی ہے۔
سندھ کے مختلف شہروں حیدرآباد، مٹیاری، بدین، ہالا، ٹنڈو باگو، میرپور خاص، ٹنڈوالہٰ یار میں بارش ہوئی۔
محکمہ موسمیات کے مطابق آج سندھ، جنوبی پنجاب، بلوچستان، اسلام آباد، بالائی خیبر پختونخوا، گلگت بلتستان اور کشمیر میں بارش کا امکان ہے۔
پی ڈی ایم اے کی جانب سے آج سے 25 جولائی کے دوران پنجاب، خیبرپختونخوا اور بلوچستان کے 18اضلاع میں بارشوں کا الرٹ جاری کیا گیا ہے۔
ندی نالوں میں طغیانی، پہاڑی علاقوں میں لینڈ سلائیڈنگ کا خدشہ بتایا جاتا ہے۔
=================
کراچی میں سب سے زیادہ بارش کہاں ہوئی؟ اعداد و شمار جاری
کراچی کے مختلف علاقوں میں رات میں ہونے والی بارش کے اعداد و شمار جاری کر دیے گئے۔
محکمۂ موسمیات کے مطابق سب سے زیادہ بارش میٹ آفس یونیورسٹی روڈ پر 2.3 ملی میٹر ریکارڈ کی گئی جبکہ ایئر پورٹ، اولڈ ایئریا، پی اے ایف بیس فیصل اور گلشن حدید میں 2 ملی میٹر بارش ہوئی۔
کورنگی اور جناح ٹرمینل پر 1.4ملی میٹر جبکہ کیماڑی میں ایک ملی میٹر اور سرجانی ٹاؤن میں 0.2 ملی میٹر بارش ریکارڈ ہوئی۔
کراچی: آج گرچ چمک کیساتھ معتدل شدت کی بارش کا امکان
کراچی میں آج گرچ چمک کے ساتھ معتدل شدت کی بارش کا امکان ہے۔
محکمۂ موسمیات کے مطابق جولائی کے آخر میں ایک اور مون سون سسٹم سندھ پر اثرانداز ہو سکتا ہے۔
شہر قائد میں اس وقت ہلکی رفتار سے سمندری ہوائیں چل رہی ہیں، جن میں نمی کا تناسب 78 فیصد ہے۔
