مشہور ہدایتکار کرسٹوفر نولن کی نئی فلم
The Odyssey
کے آئی میکس ٹکٹ اس کی ریلیز سے تقریباً ایک سال قبل ہی فروخت کے لیے پیش کیے گئے، جو محض چند منٹوں میں مکمل طور پر فروخت ہو گئے۔
غیر ملکی ذرائع کے مطابق یہ فلم یونانی شاعر ہومر کی کلاسیکی رزمیہ کہانی اوڈیسی پر مبنی ہے، اور اگرچہ اس کا پریمیئر جولائی 2026 میں طے ہے، مگر نولن کی مقبولیت اور فلم کا غیر معمولی موضوع شائقین کو ابھی سے دیوانہ بنا چکا ہے۔
ایک تشہیری حکمتِ عملی کے تحت فلم کے پہلے شوز کے آئی میکس 70 ایم ایم فارمیٹ میں ٹکٹ جمعرات کو امریکا، کینیڈا، برطانیہ، آسٹریلیا اور دیگر چند ممالک میں فروخت کے لیے رکھے گئے، اور سوشل میڈیا رپورٹس کے مطابق یہ ٹکٹ چند سیکنڈز میں ہی ختم ہو گئے۔
آئی میکس نے سوشل میڈیا پر اس خصوصی پیشکش کا اعلان کیا اور ان سنیما گھروں کی فہرست شیئر کی جن میں ابتدائی شوز دکھائے جائیں گے۔ نیویارک، لاس اینجلس، سان فرانسسکو، لندن، میلبورن اور پراگ جیسے شہروں میں شائقین نے ٹکٹ خریدنے میں زبردست دلچسپی دکھائی۔
سوشل میڈیا پلیٹ فارمز جیسے ایکس (سابقہ ٹوئٹر)، انسٹاگرام اور ٹک ٹاک پر صارفین نے ویڈیوز اور اسکرین شاٹس کے ذریعے دکھایا کہ ٹکٹ آن لائن آتے ہی کس تیزی سے فروخت ہوئے۔ ایک صارف نے بتایا کہ یونیورسل سٹی واک کا 16 جولائی کا شو صرف 3 منٹ میں تقریباً مکمل بک ہو گیا، جبکہ ایک اور صارف کے مطابق لنکن اسکوائر تھیٹر میں تمام شوز 3 منٹ سے کم وقت میں بک گئے۔
لاس اینجلس میں تو بعض سنیما گھروں میں ٹکٹ ایک منٹ سے بھی کم وقت میں ختم ہو گئے، جسے حالیہ برسوں کی کسی بھی فلم کے لیے تیز ترین ٹکٹ فروخت قرار دیا جا رہا ہے۔
The Odyssey
میں میٹ ڈیمن یونانی ہیرو اوڈیسیئس کا مرکزی کردار نبھا رہے ہیں جو ٹروجن جنگ کے بعد اپنے وطن اتھاکا واپسی کے خطرناک سفر پر روانہ ہوتا ہے۔ فلم میں ٹام ہالینڈ ان کے بیٹے ٹیلی میکس کے روپ میں نظر آئیں گے، جبکہ فلم کی دیگر اسٹار کاسٹ میں این ہیتھ وے، زینڈایا، لوپیتا نیونگو، رابرٹ پیٹنسن، چارلیز تھیرون، جون برنتھل، بینی سیفڈی، جان لیوگیزیمو اور ایلیٹ پیج شامل ہیں۔
شائقین کو اب 17 جولائی 2026 کا انتظار ہے جب یہ فلم بڑے پردے پر ریلیز ہوگی۔
