پنجاب سمیت خیبرپختونخوا کے مختلف علاقوں میں مون سون بارشوں کا ایک اور طاقتور سلسلہ شروع ہونے کو ہے۔ پنجاب ڈیزاسٹر مینجمنٹ اتھارٹی (پی ڈی ایم اے) نے 20 سے 25 جولائی کے دوران شدید موسمی حالات کے پیش نظر چوتھے مون سون اسپیل کا الرٹ جاری کر دیا ہے۔
تفصیلات کے مطابق صوبہ پنجاب کے متعدد اضلاع بشمول راولپنڈی، مری، گلیات، گجرات، جہلم، گجرانوالہ، لاہور، فیصل آباد، سیالکوٹ، نارووال، ٹوبہ ٹیک سنگھ، جھنگ، سرگودھا، اور میانوالی میں تیز ہواؤں، گرد آلود فضاؤں اور گرج چمک کے ساتھ بارش کی پیشگوئی کی گئی ہے۔
جنوبی پنجاب کے اضلاع ملتان، ڈیرہ غازی خان، بہاولپور اور بہاولنگر میں 18 سے 23 جولائی کے دوران بارشوں کی توقع ہے۔
وزیراعلیٰ پنجاب کی ہدایت پر تمام ضلعی انتظامیہ اور متعلقہ ادارے جیسے کہ صحت، آبپاشی، تعمیرات، لوکل گورنمنٹ اور لائیوسٹاک کے محکموں کو الرٹ کر دیا گیا ہے۔
ادھر خیبرپختونخوا میں بھی 20 سے 25 جولائی کے دوران وقفے وقفے سے شدید بارشوں کی پیشگوئی کی گئی ہے، جو دیر، سوات، چترال، شانگلہ، کوہستان، بونیر، مردان، پشاور، نوشہرہ، وزیرستان، باجوڑ، اورکزئی اور دیگر اضلاع کو متاثر کر سکتی ہے۔ اس دوران مقامی ندی نالوں میں طغیانی اور پہاڑی علاقوں میں لینڈ سلائیڈنگ کا خطرہ بھی موجود ہے۔
پی ڈی ایم اے نے تمام امدادی اداروں اور ریسکیو 1122 کو ہائی الرٹ پر رکھتے ہوئے شہریوں سے احتیاطی تدابیر اختیار کرنے کی اپیل کی ہے۔ عوام سے کہا گیا ہے کہ آندھی، ژالہ باری یا شدید بارش کے دوران کھلے مقامات سے گریز کریں اور محفوظ پناہ گاہوں کا رخ کریں۔
انتظامیہ کو ہدایت کی گئی ہے کہ شہری علاقوں میں اربن فلڈنگ سے بچاؤ کے لیے نکاسی آب کے نظام کی صفائی کو یقینی بنایا جائے، جبکہ کسانوں کو ہدایت کی گئی ہے کہ فصلوں کی جلد کٹائی کریں اور مویشیوں کو محفوظ جگہوں پر منتقل کریں۔
پی ڈی ایم اے کا ایمرجنسی آپریشن سینٹر مکمل فعال ہے اور کسی بھی ہنگامی صورتحال کی اطلاع دینے کے لیے ہیلپ لائن 1700 پر رابطہ کیا جا سکتا ہے۔
