یو جی پی آر گوادر 18جولائی 2025
گوادر یونیورسٹی میں نئے تعلیمی سمسٹر کی تیاری کے سلسلے میں ایک اہم اجلاس کا انعقاد کیا گیا، جس کی صدارت وائس چانسلر پروفیسر ڈاکٹر عبدالرزاق صابر نے کی۔ اجلاس کا مقصد فال 2025 کے داخلہ مہم کی پیش رفت اور نئے تعلیمی سمسٹر کی تیاریوں کا جائزہ لینا تھا۔
وائس چانسلر نے کہا کہ گوادر یونیورسٹی خطے میں اعلیٰ تعلیم اور بالخصوص بلیو اکانومی سے متعلق تعلیم اور تحقیق کے فروغ کے لیے پرعزم ہے۔ انہوں نے تمام متعلقہ شعبہ جات کو ہدایت دی کہ نئے سمسٹر کے آغاز سے قبل تمام انتظامات کو حتمی شکل دی جائے۔
اجلاس میں پرو وائس چانسلر پروفیسر ڈاکٹر سید منظور احمد، رجسٹرار دولت خان، کنٹرولر امتحانات ڈاکٹر رحیم مہر، ڈائریکٹر فنانس رحمت اللہ، ڈائریکٹر اوریک محمد ارشاد، اور انچارج ایڈمیشنز نصیر احمد شریک ہوئے۔
اجلاس کے دوران داخلہ مہم کو مؤثر اور فعال بنانے، اور اسے طلبہ کے لیے سہل اور شفاف بنانے پر زور دیا گیا تاکہ زیادہ سے زیادہ طلبہ یونیورسٹی کے تعلیمی پروگراموں سے استفادہ حاصل کر سکیں۔
اجلاس میں ایک اہم تعلیمی پیش رفت کا اعلان بھی کیا گیا، جس کے مطابق اگلے تعلیمی سال سے 2.5 سالہ برج ڈگری پروگرامز کا آغاز کیا جائے گا۔ یہ پروگرام ان طلبہ کے لیے ترتیب دیا گیا ہے جنہوں نے 14 سالہ تعلیم مکمل کی ہے اور وہ بیچلر ڈگری کی جانب بڑھنا چاہتے ہیں۔ یہ ایک جامع اور لچکدار تعلیمی راستہ فراہم کرے گا۔
اس موقع پر وائس چانسلر نے یہ بھی اعلان کیا کہ یونیورسٹی انتظامیہ طلبہ کی مالی معاونت کے لیے مزید اسکالرشپس متعارف کروانے پر کام کر رہی ہے، تاکہ تعلیم ہر طبقے کے طلبہ کے لیے قابلِ رسائی بن سکے۔
وائس چانسلر نے تمام شعبہ جات کی کاوشوں کو سراہتے ہوئے ہدایت دی کہ تمام فیصلوں پر فوری اور مؤثر عمل درآمد کو یقینی بنایا جائے تاکہ تعلیمی معیار اور ادارہ جاتی کارکردگی برقرار رکھی جا سکے۔
