بھارت کی مشرقی ریاست بہار میں مون سون کے شدید طوفان کے دوران آسمانی بجلی گرنے کے واقعات میں کم از کم 33 افراد ہلاک اور درجنوں زخمی ہو گئے ہیں۔ بھارتی میڈیا رپورٹس کے مطابق یہ حادثات بدھ سے جمعرات کی درمیانی راتوں میں شدید طوفانی موسم کے دوران پیش آئے۔ بہار کے ڈیزاسٹر مینجمنٹ ڈیپارٹمنٹ کے حکام نے بتایا کہ ہلاک ہونے والوں میں زیادہ تر کسان اور مزدور شامل ہیں جو کھلے آسمان تلے کام کر رہے تھے۔
محکمہ موسمیات نے ریاست کے مختلف علاقوں میں مزید تیز بارش اور آسمانی بجلی گرنے کی وارننگ جاری کی ہے۔ بہار کے ڈیزاسٹر مینجمنٹ کے وزیر وجے کمار منڈل نے متعلقہ اضلاع کے حکام کو ہدایت کی ہے کہ وہ آسمانی بجلی کے خطرے کے پیش نظر عوام میں احتیاطی تدابیر کی آگاہی مہم چلائیں۔
ریاستی حکومت نے آسمانی بجلی کے باعث ہلاک ہونے والے افراد کے اہل خانہ کے لیے 40 لاکھ روپے کے معاوضے کا اعلان کیا ہے۔ سال 2024 میں بہار میں آسمانی بجلی گرنے کے واقعات میں کم از کم 243 افراد ہلاک ہو چکے ہیں جبکہ پچھلے سال یہ تعداد 275 تھی۔
بہار سمیت بھارت کے مشرقی علاقے مون سون کے دوران ہر سال سیلابی صورتحال کا سامنا کرتے ہیں، جس میں درجنوں افراد اپنی جان سے ہاتھ دھو بیٹھتے ہیں اور لاکھوں لوگ نقل مکانی کرنے پر مجبور ہو جاتے ہیں۔
