وفاقی ادارہ برائے قدرتی آفات این ڈی ایم اے نے خبردار کیا ہے کہ ملک میں جاری شدید بارشوں کی وجہ سے آئندہ 24 گھنٹوں میں مختلف شہروں میں سیلاب اور ندی نالوں میں طغیانی کا خطرہ ہے۔ این ڈی ایم اے کے بیان کے مطابق پنجاب کے کئی اضلاع بشمول لاہور، چکوال، اٹک، جہلم، خوشاب، سرگودھا، گجرات، گوجرانوالہ، فیصل آباد، سیالکوٹ، نارووال، اوکاڑہ، قصور، شیخوپورہ اور حافظ آباد میں آنے والے 12 گھنٹوں کے دوران شدید بارش اور تیز ہواؤں کے ساتھ طوفان کی توقع ہے۔
مزید بتایا گیا ہے کہ راولپنڈی اور اسلام آباد میں اگلے 24 سے 48 گھنٹوں تک وقفے وقفے سے موسلادھار بارش جاری رہنے کا امکان ہے، جس سے نالہ لئی میں طغیانی اور نشیبی علاقوں میں سیلابی صورتحال پیدا ہو سکتی ہے۔ این ڈی ایم اے نے نالہ لئی کے قریبی اور خطرے والے علاقوں کے رہائشیوں کو سائرن بجنے پر فوری انخلاء کی تیاری رکھنے کی ہدایت کی ہے۔
ادارہ نے عوام سے درخواست کی ہے کہ ندی نالوں، پلوں اور پانی میں ڈوبی ہوئی سڑکوں سے گزرتے وقت انتہائی احتیاط برتیں اور حساس علاقوں کے رہائشی کم از کم تین سے پانچ دن کا کھانا، پانی اور ادویات کا ایمرجنسی کٹ تیار رکھیں۔
شدید بارشوں کی وجہ سے اسلام آباد انٹرنیشنل ایئرپورٹ پر پروازوں کا نظام بھی متاثر ہوا ہے، جہاں اب تک تقریباً 30 پروازیں تاخیر کا شکار ہو چکی ہیں۔ ایئرلائنز نے مسافروں کو مشورہ دیا ہے کہ وہ فلائٹ کی معلومات کے لیے متعلقہ ہیلپ لائنز سے رابطہ کریں اور بارش کے باعث ایئرپورٹ پر بروقت پہنچیں۔
دوسری جانب چکوال میں دھرابی ڈیم کے قریب واقع ایک نجی ڈیم بھی ٹوٹ گیا ہے، جس سے علاقے میں رابطہ سڑکوں کو نقصان پہنچا ہے اور مسلسل بارشوں کی وجہ سے پانچ کلومیٹر کا سفر مشکل ہو گیا ہے۔ مقامی افراد نے بتایا کہ شدید بارشوں کے باعث انفراسٹرکچر کو کافی نقصان پہنچا ہے۔
