ندا یاسر کا کیمرا، ترکیہ میں ڈائمنڈ سیٹ چوری
اٹلی میں کیمرا، ترکیہ میں ڈائمنڈ سیٹ چوری، ندا یاسر نے بیرونِ ملک پیش آنے والے واقعات بیان کر دیے
اداکارہ و ٹی وی میزبان ندا یاسر نے ایک پوڈکاسٹ کے دوران بیرونِ ملک سفر کے دوران پیش آنے والے چوری کے دلچسپ اور افسوسناک واقعات شیئر کیے، جن میں اٹلی میں کیمرا اور ترکیہ میں ڈائمنڈ جیولری کی چوری شامل ہے۔
ندا یاسر نے حال ہی میں شیڈو پروڈکشن کے پوڈکاسٹ میں شرکت کی، جس میں انہوں نے مختلف معاملات پر کھل کر گفتگو کی۔
ندا یاسر نے بتایا کہ انہیں بچپن میں چاکلیٹ کھانے کا بے حد شوق تھا اور وہ نہ صرف اپنی بلکہ دوسروں کی چاکلیٹس بھی کھا جاتی تھیں۔
ان کے مطابق ان کی پہلی انٹرنیشنل فلائٹ کے دوران ان کے والدین اور بہنوں نے انہیں بے وقوف بنایا، فلائٹ کے دوران وہ سو گئیں اور جب جاگیں تو ان سے کہا گیا کہ جہاز کے قریب سے چاکلیٹ کے پہاڑ اور آئس کریم کے آبشار گزرے ہیں، جسے سن کر وہ افسردہ ہو گئی تھیں۔
پوڈکاسٹ کے دوران انہوں نے یہ بھی بتایا کہ ان کے ساتھ چوری کے واقعات پاکستان میں کم جب کہ بیرونِ ملک زیادہ پیش آئے ہیں۔
ندا یاسر نے بتایا کہ پہلی بار جب وہ والدین کے ساتھ اٹلی گئیں تو ان کا کیمرا چوری ہو گیا تھا، اسی سفر میں وہ اور ان کے گھر والے رات کو ٹرین میں سفر کر رہے تھے، اس دوران انہوں نے وینس سے خریدا ہوا کرسٹل کا سامان ایک ہُک پر لٹکا دیا، جو رات کو کسی نے چوری کر لیا۔
انہوں نے مزید کہا کہ حال ہی میں وہ ترکیہ کے سفر پر گئیں اور انہوں نے سوچا کہ وہاں چوری جیسے واقعات نہیں ہوتے، اس لیے اپنی بیش قیمت جیولری، جس میں ڈائمنڈ کا سیٹ شامل تھا، پہن کر چلی گئیں۔
ندا نے بتایا کہ جب وہ ترکیہ گھومتے گھومتے استنبول پہنچیں تو انہوں نے وہ جیولری اتار کر کمرے کی دراز میں رکھ دی اور پھر پورے سفر کے دوران نہ تو دوبارہ پہنی اور نہ ہی چیک کی۔
ان کا کہنا تھا کہ جب وہ پاکستان واپس آنے لگیں تو دراز سے جیولری نکالنے کی کوشش کی، لیکن وہاں کچھ بھی نہیں تھا، ان کی ڈائمنڈ کی جیولری چوری ہو چکی تھی۔
میزبان نے مزید بتایا کہ جب وہ ایف آئی آر درج کروانے ترکیہ کے پولیس اسٹیشن گئیں تو انہیں پوری رات اسٹیشن کے باہر گزارنی پڑی، حالت اتنی خراب تھی کہ ایسا محسوس ہو رہا تھا جیسے وہ خود چور ہوں۔
