پاکستانی اداکار اور میزبان احسن خان نے حال ہی میں لندن میں ہونے والی ایک تقریب میں بھارت کے معروف مصنف اور گیت نگار جاوید اختر اور ان کی اہلیہ، معروف اداکارہ شبانہ اعظمی سے ملاقات کی۔
تقریب کی ویڈیوز سوشل میڈیا پر تیزی سے گردش کر رہی ہیں، جن میں دیکھا جا سکتا ہے کہ احسن خان جاوید اختر اور شبانہ اعظمی سے گرمجوشی سے ہاتھ ملا رہے ہیں اور خوشگوار موڈ میں گفتگو بھی کر رہے ہیں۔
تقریب کے دوران احسن خان نے مختصر خطاب بھی کیا جس میں انہوں نے زور دیا کہ ہمیں مل جل کر امن کیلئے کام کرنا چاہیے اور ایک دوسرے کے اختلافات کو بات چیت اور محبت سے دور کرنا چاہیے۔
@murtazaviews Pakistani actor Ahsan Khan calls for peace at an event in the UK Parliament featuring Javed Akhtar and Shabana Azmi #AhsanKhan #JavedAkhtar #ShabanaAzmi
تاہم ان کے اس عمل پر سوشل میڈیا پر ملا جلا ردعمل سامنے آیا۔ کچھ صارفین نے احسن خان پر تنقید کی کہ انہوں نے جاوید اختر جیسے شخص سے مصافحہ کیوں کیا جو پاکستان مخالف بیانات دینے کے لیے مشہور ہیں۔ کئی لوگوں کا کہنا تھا کہ بہتر ہوتا اگر امن کا پیغام خود جاوید اختر کی جانب سے آتا۔
کچھ صارفین نے یہ بھی لکھا کہ اگر احسن خان کو مجبوری میں جاوید اختر سے ملنا ہی پڑا تو انہیں موقع پر دو ٹوک جواب دینا چاہیے تھا۔
دوسری طرف چند لوگوں نے احسن خان کے مؤقف کو سراہتے ہوئے کہا کہ انہوں نے نفرت کا جواب محبت سے دے کر واضح پیغام دیا کہ پاکستان میں لوگ جنگ یا نفرت نہیں، بات چیت اور بھائی چارے پر یقین رکھتے ہیں۔
