صوبہ پنجاب کے دارالحکومت لاہور اور گرد و نواح میں رات بھر جاری رہنے والی تیز اور مسلسل بارش نے کئی علاقوں کو پانی میں ڈبو دیا، جس کے نتیجے میں مختلف حادثات پیش آئے جن میں ایک ہی گھر کے 5 افراد سمیت 10 شہری زندگی کی بازی ہار گئے۔
تفصیلات کے مطابق لاہور کے علاقے پانی والا تالاب میں 171 ملی میٹر بارش ریکارڈ کی گئی جو اس مون سون سیزن کی اب تک کی سب سے زیادہ مقدار ہے، جبکہ اقبال ٹاؤن میں 169 ملی میٹر اور تاجپورہ میں 167 ملی میٹر بارش ہوئی۔ اس کے علاوہ مغلپورہ میں 135 ملی میٹر اور لکشمی چوک میں 133 ملی میٹر بارش ریکارڈ ہوئی۔
شدید بارش کے باعث ٹھوکر نیاز بیگ کے علاقے میں ایک گھر کی چھت گرنے کا افسوسناک واقعہ پیش آیا، جس میں ایک ہی خاندان کے 5 افراد جاں بحق ہو گئے۔ جاں بحق افراد میں 60 سالہ مانگا، 55 سالہ عشرت، 35 سالہ رانی، 4 سالہ لطیفہ اور 3 سالہ خدیجہ شامل ہیں۔ حادثے میں 30 سالہ فیصل اور 5 سالہ ببلی زخمی ہوئے جنہیں فوری طور پر اسپتال منتقل کر دیا گیا۔
اسی طرح رائیونڈ کی مشن کالونی میں مکان کی چھت گرنے سے 3 افراد جان کی بازی ہار گئے جبکہ ایک شخص کو زندہ نکال لیا گیا۔ ہربنس پورہ میں کرنٹ لگنے کے واقعے میں 2 بچے جاں بحق ہوئے۔
مزید برآں اسلام آباد اور راولپنڈی سمیت پنجاب کے مختلف شہروں جیسے ڈسکہ، حافظ آباد، وزیرآباد، سانگلہ ہل، گوجرانوالہ، فیصل آباد، ننکانہ صاحب، منچن آباد، بہاولنگر، پاکپتن، عارف والا، قصور اور فاروق آباد میں بھی موسلادھار بارش کے باعث نشیبی علاقے زیرِ آب آ گئے ہیں۔ آزاد کشمیر کے مختلف علاقوں میں بھی وقفے وقفے سے بارش جاری ہے جبکہ محکمہ موسمیات نے آئندہ 24 گھنٹوں کے دوران پنجاب کے بیشتر اضلاع میں مزید تیز بارش کی پیشگوئی کی ہے۔
محکمہ موسمیات کے مطابق مون سون کا یہ سلسلہ 17 جولائی تک جاری رہ سکتا ہے۔ خیبرپختونخوا کے کئی اضلاع میں شدید بارشوں اور لینڈ سلائیڈنگ کا خدشہ ظاہر کیا گیا ہے جس کے پیش نظر این ڈی ایم اے نے الرٹ جاری کر دیا ہے۔
