ایڈونچر اور جادو سے بھرپور ہیری پوٹر کی دنیا میں دوبارہ کھو جانے کے لیے شائقین تیار ہو جائیں، کیونکہ مقبول سائنس فکشن فلم ’ہیری پوٹر‘ پر مبنی نئی ٹی وی سیریز کی پروڈکشن کا باقاعدہ آغاز ہو چکا ہے۔
برطانوی نشریاتی ادارے بی بی سی کے مطابق طویل انتظار کے بعد اس شہرۂ آفاق ناول سیریز کو ٹی وی اسکرین پر لانے کے لیے وارنر برادرز اسٹوڈیوز لیوزڈن (برطانیہ) میں شوٹنگ شروع کر دی گئی ہے۔ اس کا اعلان ہیری پوٹر کے نئے کردار کی مخصوص یونیفارم میں پہلی جھلک کے ساتھ کیا گیا۔
پروڈیوسرز کی جانب سے جاری کی گئی تصویر میں 11 سالہ ڈومینک میک لافلن کو ہیری پوٹر کے روپ میں دیکھا جا سکتا ہے — گول چشمہ، ہاگ وارٹس کی یونیفارم اور پیشانی پر بجلی کی طرح کا نشان مداحوں کو ایک بار پھر ڈینیئل ریڈکلف کی یاد دلا رہا ہے، جنہوں نے فلمی سیریز میں ہیری پوٹر کا کردار امر کر دیا تھا۔ اس کے ساتھ ہی نئی کاسٹ کے دیگر اہم نام بھی سامنے آ گئے ہیں۔
نئے کاسٹ میں روری ولموٹ نیویل لانگ بوٹم کا کردار نبھائیں گے، اموس کٹسن ڈڈلی ڈرسلے کے روپ میں نظر آئیں گے، لوئیس بریلی میڈم رولینڈا ہوچ بنیں گی اور اینٹون لیسر گیرک اولی وینڈر کے کردار میں جلوہ گر ہوں گے۔
جے کے رولنگ کی شہرہ آفاق کہانی پر پہلے فلمی سیریز بن چکی ہے، لیکن اب اسی دنیا کو ٹی وی اسکرین پر نئی کہانیوں کے ساتھ پیش کیا جائے گا۔ بتایا جا رہا ہے کہ پوری سیریز کو مکمل ہونے میں تقریباً 10 سال لگ سکتے ہیں، جبکہ پہلا سیزن 2027 میں ریلیز کیا جائے گا۔
