حیدرآباد میں آندھی کے ساتھ موسلادھار بارش کے دوران دکان کی چھت گرنے سے ایک شخص جاں بحق اور تین زخمی ہوگئے، سڑکوں اور گلیوں پر پانی کھڑا ہوگیا، فیڈرز ٹرپ کرنے سے شہر بجلی سے محروم ہوگیا۔
ڈان نیوز کے مطابق محکمہ موسمیات کا کہنا ہے کہ حیدرآباد شہر میں آدھے گھنٹے کےدوران 63 ملی میٹر بارش ریکارڈکی گئی، جبکہ حیدرآباد کے ایئرپورٹ کے علاقے میں 50 ملی میٹر بارش ریکارڈ کی گئی۔
پولیس کے مطابق بارش کے باعث دکان کی چھت کا ایک حصہ گرگیا، جس کے نتیجے میں ایک شخص جاں بحق اور 3افراد زخمی ہوگئے، جنہیں ہسپتال منتقل کر دیا گیا، چھت گرنے کا واقعہ ٹمبرمارکیٹ میں پیش آیا۔
دریں اثنا، شدید بارش سے حیدرآباد الیکٹرک سپلائی کمپنی ( حیسکو) کے 152فیڈرز ٹرپ کرگئے۔
ترجمان حیسکو کے مطابق 52 فیڈرز پر بجلی کی فراہمی بحال کر دی گئی، جبکہ دیگر 100 فیڈرز کو موسم بہتر ہونے پربحال کردیاجائےگا۔
موسلادھار بارش کے ساتھ آندھی سے مختلف علاقوں میں سولر پینلز کو بھی نقصان پہنچا، جبکہ بارش کے بعد سڑکوں اور گلیوں میں 2 سے 3 فٹ پانی جمع ہوگیا جبکہ بعض علاقوں میں بارش کا پانی گھروں اور دکانوں میں داخل ہوگیا جس سے مکینوں کو پریشانی کا سامنا ہے۔
سندھ کے کئی شہروں میں موسلادھار بارش، حیدرآباد میں کلاؤڈ برسٹ
حیدرآباد سمیت سندھ کے کئی شہروں میں تیزہواؤں کے ساتھ موسلادھار بارش ہوئی ہے۔ بارش کے باعث نشیبی علاقےزیر آب آ گئے ہیں۔
ڈپٹی کمشنر زین العابدین کا کہنا ہے کہ حیدرآباد شہر میں کلاؤڈ برسٹ ہوا ہے۔
حیدرآباد، ٹنڈو الہ یار، ٹنڈو محمد خان، جامشورو، مٹیاری، ہالہ میں تیزہواؤں کے ساتھ موسلادھار بارش ہوئی، جس کے باعث نشیبی علاقے زیر آب آگئے۔
ڈپٹی کمشنر زین العابدین کا کہنا ہے کہ حیدرآباد شہر میں کلاؤڈ برسٹ ہوا ہے، الرٹ جاری کیا ہے، پمپنگ اسٹیشنوں کو چلانے کی کوشش کررہے ہیں۔
ڈپٹی کمشنر کا کہنا ہے کہ پھلیلی نہر کی پانی کی سطح زیرو کرنے کیلئے محکمہ آبپاشی کو ہدایت کی ہے، بجلی کی عدم فراہمی کے باعث جنریٹر سے پانی کی نکاسی کررہے ہیں۔
خیبرپختونخوا: بارشوں اور ممکنہ سیلاب کے پیش نظر الرٹ جاری
ترجمان حیسکو کا کہنا ہے کہ حیدرآباد ریجن کے 220 فیڈر ٹرپ کرگئے۔
ریسکیو حکام کے مطابق ٹمبر مارکیٹ میں لکڑیوں کے گودام کی چھت گر گئی، ایک شخص جاں بحق اور تین زخمی ہوگئے۔
ٹنڈوالہ یار میں تیز ہواؤں کے ساتھ موسلا دھار بارش کے نتیجے میں نشیبی علاقوں میں پانی گھروں میں داخل ہوگیا، جس کے باعث شہریوں کو مشکلات کا سامنا ہے۔
