ملک بھر کی ٹرانسپورٹ ایسوسی ایشنز نے تاجر برادری کی حمایت میں 19 جولائی کو مکمل پہیہ جام کرنے کا اعلان کر دیا ہے۔ کراچی گڈز کیریئر ایسوسی ایشن کے صدر ملک شیر خان نے کہا کہ ہم تاجروں کے مطالبات کے حق میں ان کے ساتھ کھڑے ہیں اور ملک بھر میں اس روز کوئی گاڑی یا سامان کی سپلائی نہیں چلے گی۔
ان کا کہنا تھا کہ اگر تاجروں نے ہڑتال کو مزید طول دینے کا کہا تو ہم اس کے لیے بھی تیار ہیں۔ ملک شیر خان نے بتایا کہ تمام ٹرانسپورٹرز کراچی چیمبر آف کامرس کی کال پر دی جانے والی ملک گیر ہڑتال میں شریک ہوں گے اور جب تک کراچی چیمبر کے مطالبات پورے نہیں ہوتے گڈز ٹرانسپورٹ بند رکھی جائے گی۔
اس حوالے سے کراچی چیمبر آف کامرس میں ملک کی مختلف ٹرانسپورٹ ایسوسی ایشنز کے سربراہان نے چیمبر کے صدر جاوید بلوانی کے ساتھ مشترکہ پریس کانفرنس بھی کی۔
واضح رہے کہ یہ احتجاج فنانس بل میں سیلز ٹیکس ایکٹ کی شقوں 37 اے اور بی کے خلاف کیا جا رہا ہے۔ صدر کراچی چیمبر جاوید بلوانی کا کہنا تھا کہ وزیر خزانہ ہمارے پانچ مطالبات وقتی طور پر معطل کر دیں تو ہڑتال ختم کی جا سکتی ہے۔ ان کے مطابق وزیراعظم ہاؤس اور وزارت خزانہ سے مذاکرات کے پیغامات تو موصول ہو رہے ہیں مگر وزیر خزانہ کراچی آکر بات چیت پر آمادہ نہیں۔
انہوں نے کہا کہ ہم نے ایک ایمرجنسی اجلاس میں فیصلہ کیا ہے کہ حکومت سے مذاکرات صرف اسی شرط پر ہوں گے جب مطالبات فوری طور پر مؤخر کیے جائیں گے، بصورت دیگر ہڑتال برقرار رہے گی۔ جاوید بلوانی نے مزید کہا کہ ٹرانسپورٹ برادری نے ہمیں یقین دہانی کرائی ہے کہ اگر ہڑتال طویل ہوئی تو بھی وہ تاجروں کے ساتھ ڈٹے رہیں گے۔
