ملک کے مختلف حصوں میں وقفے وقفے سے تیز اور ہلکی بارشوں کا سلسلہ جاری ہے جس سے نشیبی علاقے پانی میں ڈوب گئے ہیں اور متعدد شہروں میں بجلی کی فراہمی متاثر ہو کر نظامِ زندگی درہم برہم ہوگیا ہے۔
محکمہ موسمیات کے مطابق یہ سلسلہ 17 جولائی تک برقرار رہنے کا امکان ہے۔ لاہور میں بھی وقفے وقفے سے بارش کے باعث گرمی کی شدت میں کمی آئی ہے۔ شہر کے کئی علاقوں میں بارش کے بعد فیڈرز ٹرپ کرگئے، جس سے بجلی کی بندش نے شہریوں کی مشکلات بڑھا دی ہیں۔
فیصل آباد، گجرات، حافظ آباد، ڈیرہ غازی خان، کوہلو اور کمالیہ سمیت پنجاب کے مختلف شہروں میں بارش سے سڑکیں تالاب بن گئیں، کئی گھروں میں پانی داخل ہوگیا جبکہ متعدد علاقوں میں بجلی کا نظام بھی درہم برہم ہو گیا ہے۔
خیبرپختونخوا میں بھی طوفانی بارشوں اور آسمانی بجلی گرنے کے واقعات میں کم از کم 10 افراد جان کی بازی ہار گئے جن میں 8 بچے بھی شامل ہیں۔ صوبے کے کئی علاقوں میں بارش کے باعث مکانوں کی چھتیں اور دیواریں گرنے سے جانی نقصان ہوا۔ ٹانک میں شدید بارشوں نے ندی نالوں میں طغیانی پیدا کر دی جس سے سیلابی ریلے نے گھروں اور سڑکوں کو نقصان پہنچایا۔
اوکاڑہ میں آسمانی بجلی گرنے سے دو افراد جبکہ منچن آباد میں مدرسے کی چھت گرنے سے دو طالبعلم جاں بحق اور متعدد زخمی ہوگئے۔ صحبت پور میں تیز ہوا اور بارش کے باعث گرڈ اسٹیشن کی لائن متاثر ہوئی جس سے علاقے کی بجلی بند ہو گئی۔
لکی مروت میں شدید بارشوں نے زمینی رابطے بھی منقطع کر دیے ہیں۔ درہ تنگ روڈ پر سیلابی ریلے سے پل بہہ جانے کے باعث پنجاب جانے والی سڑک بند ہے، جس سے مسافر گھنٹوں سڑکوں پر پھنسے رہے۔
محکمہ موسمیات نے بالائی خیبرپختونخوا، چترال، سوات، مانسہرہ، بٹگرام اور دیگر اضلاع میں مزید بارشوں اور لینڈ سلائیڈنگ کا الرٹ جاری کر دیا ہے جبکہ سندھ میں عمرکوٹ، مٹھی، سکھر اور لاڑکانہ سمیت کئی شہروں میں بارش کی پیشگوئی ہے۔ کراچی میں اگلے تین روز تک مطلع ابر آلود اور موسم مرطوب رہنے کا امکان ہے۔
انتظامیہ کی جانب سے امدادی سرگرمیاں جاری ہیں جبکہ عوام سے احتیاط برتنے کی اپیل کی گئی ہے۔
