پاکستان اور روس کے درمیان تعلقات میں ایک اور پیش رفت سامنے آئی ہے، دونوں ممالک کے درمیان تجارتی سامان لے جانے والی ریل گاڑی اگلے ماہ سے پٹری پر دوڑنے لگے گی۔ لاہور سے روس تک جانے والی اس مال بردار ٹرین کی تیاریاں آخری مرحلے میں داخل ہو چکی ہیں۔
دفتر خارجہ کے ذرائع کا کہنا ہے کہ اگست میں اس منصوبے کا آزمائشی مرحلہ شروع کیا جائے گا۔ پہلی مال گاڑی 16 بوگیوں پر مشتمل ہوگی جو ایران، ترکمانستان اور قازقستان کے راستے روس تک پہنچے گی۔ اس ریل سروس کے ذریعے روس سمیت ترکمانستان اور قازقستان سے مختلف اشیاء پاکستان لائی جا سکیں گی۔
حکام کا کہنا ہے کہ اس اقدام سے جنوبی ایشیا اور وسطی ایشیا کے درمیان تجارتی سرگرمیوں کو مزید وسعت ملے گی اور ساتھ ہی روزگار کے نئے مواقع بھی پیدا ہوں گے۔
واضح رہے کہ کچھ دن قبل وزیر اعظم کے معاون خصوصی طارق فاطمی اور معاون خصوصی برائے صنعت و پیداوار ہارون اختر نے روس کا دورہ کیا تھا۔ اس موقع پر پاکستان اور روس کے درمیان پاکستان اسٹیل ملز کی بحالی سے متعلق معاہدے پر بھی دستخط ہوئے تھے۔
