وزیراعظم شہباز شریف نے کہا ہے کہ پاکستان اسٹاک ایکسچینج کا ریکارڈ سطح تک پہنچنا اس بات کا ثبوت ہے کہ ملکی کاروباری طبقہ معیشت پر مکمل اعتماد رکھتا ہے۔
پیر کے روز وزیراعظم ہاؤس کی جانب سے جاری کردہ بیان میں کہا گیا کہ وزیراعظم نے اسٹاک ایکسچینج کے 1 لاکھ 35 ہزار پوائنٹس کی بلند ترین سطح تک پہنچنے پر خوشی کا اظہار کیا۔ وزیراعظم کے مطابق یہ سنگ میل حکومتی معاشی پالیسیوں کی درست سمت اور سرمایہ کاروں کے اعتماد کی عکاسی کرتا ہے۔
انہوں نے کہا کہ کاروباری طبقے کو سرمایہ کاری کے لیے سازگار ماحول فراہم کرنا حکومت کی اولین ترجیح ہے۔ وزیراعظم نے کہا کہ پاکستان اب معاشی استحکام کے بعد ترقی کی راہ پر گامزن ہو چکا ہے اور حکومت ملک کی خوشحالی اور عوامی بہبود کے لیے پوری تندہی سے کام کر رہی ہے۔
