پاکستان اور بھارت میں یہ رجحان تیزی سے پھیل رہا ہے کہ جو چیز یا شخصیت مقبول ہو جائے، لوگ اس کے نام یا تصویر کو مصنوعات یا کاروبار کی تشہیر میں استعمال کرنے لگتے ہیں۔
اسی سلسلے میں ڈنمارک کی مشہور غیر ملکی انفلوئنسر فریڈریکا نے جب ایک بھارتی پاپڑ کے پیکٹ پر لیجنڈری اداکار امیتابھ بچن کی تصویر دیکھی تو وہ انہیں واقعی پاپڑ بیچنے والا سمجھ بیٹھیں!
فریڈریکا نے اپنی انسٹاگرام ویڈیو میں ایک مشہور بھارتی پاپڑ برانڈ کا پیکٹ دکھایا، جس پر امیتابھ بچن کی تصویر چھپی تھی۔ فریڈریکا نے بتایا کہ انہوں نے یہ مونگ دال پاپڑ مقامی بازار سے خریدے، جو ان کے مطابق بہت ہی ذائقے دار نکلے۔
ویڈیو میں وہ بڑی معصومیت سے کہتی ہیں کہ ’’یہ آدمی بہت زبردست پاپڑ بناتا ہے! کیا کسی کو پتا ہے کہاں سے اور مل سکتے ہیں؟ میرا اسٹاک ختم ہونے والا ہے۔‘‘
دلچسپ بات یہ ہے کہ انہیں یہ علم ہی نہیں تھا کہ جسے وہ پاپڑ فروش سمجھ رہی ہیں، وہ دراصل بھارتی فلم انڈسٹری کا سپر اسٹار ہے!
ویڈیو جیسے ہی سوشل میڈیا پر پھیلی، صارفین نے اس پر مزے مزے کے تبصرے کیے اور فریڈریکا کی معصومیت کو خوب سراہا۔ اس واقعے نے سب کو ہنسنے کا ایک اور بہانہ دے دیا۔
