کراچی میں ایک افسوسناک واقعے میں شوہر نے اپنی بیوی کو مبینہ طور پر تیزاب پلا کر موت کے گھاٹ اتار دیا۔ اطلاعات کے مطابق کورنگی بلال کالونی میں پیش آنے والے اس واقعے میں نور عائشہ نامی خاتون کو شدید حالت میں جناح اسپتال منتقل کیا گیا جہاں وہ جانبر نہ ہو سکی۔ پولیس کے مطابق نور عائشہ کے والد نے اپنی بیٹی کے شوہر ایوب اور دیور رفیق پر الزام عائد کیا ہے کہ انہوں نے مل کر اسے تیزاب پلایا۔ پولیس نے مقتولہ کے والد علی اکبر کی مدعیت میں قتل کا مقدمہ درج کر کے تفتیش شروع کر دی ہے۔ ابتدائی شواہد کے مطابق نور عائشہ پر واقعی تیزاب پھینکنے کی تصدیق ہوئی ہے جبکہ پولیس مزید پہلوؤں پر بھی تحقیقات کر رہی ہے۔
نور عائشہ کے والد کا کہنا ہے کہ ان کی بیٹی کی اپنے شوہر سے اکثر لڑائی جھگڑے ہوتے تھے جن کی وجہ اس کے ناجائز تعلقات تھے۔ کئی بار نور عائشہ میکے واپس بھی آ چکی تھی، اور اس بار بھی جھگڑے کے بعد ملزمان نے نہ صرف تیزاب پلایا بلکہ اس پر تشدد بھی کیا۔ دوسری جانب کراچی میں ہی ایک اور دل دہلا دینے والا واقعہ سامنے آیا جہاں جوڈیشل مجسٹریٹ جنوبی کی عدالت میں نئی نویلی دلہن پر غیر انسانی سلوک اور تشدد کے مقدمے کی سماعت ہوئی۔ پولیس کے مطابق ملزم اشوک نے اپنی بیوی کو تشدد کا نشانہ بناتے ہوئے اس کے جسم میں لوہے کا راڈ ڈال دیا اور اسے شدید زخم دیے۔ متاثرہ خاتون اس وقت اسپتال کے ٹراما سینٹر میں کوما میں ہے۔ عدالت نے ملزم کا تین روزہ جسمانی ریمانڈ منظور کرتے ہوئے مزید پیش رفت رپورٹ طلب کر لی ہے۔ اس معاملے میں ملزم کے خلاف تھانہ بغدادی میں مقدمہ درج کیا گیا ہے۔
Ask ChatGPT
