اسلام آباد کے علاقے نالہ کورنگ میں ایک موٹرسائیکل سوار تیز سیلابی پانی کی لپیٹ میں آکر بہہ گیا۔ ریسکیو ذرائع کے مطابق نوجوان کو تلاش کرنے کے لیے امدادی کارروائیاں جاری ہیں جبکہ نالہ کورنگ کے کنارے بنے کچے مکانات کو بھی نقصان پہنچا ہے۔ سوشل میڈیا پر ایک ویڈیو بھی گردش کر رہی ہے جس میں دیکھا جا سکتا ہے کہ پل پر لوگ اپنی گاڑیاں اور موٹرسائیکلیں گزار رہے تھے کہ اچانک تیز رفتار ریلہ آیا اور موٹرسائیکل سوار کو بہا کر لے گیا۔
ریسکیو حکام نے نالہ کورنگ کے قریب رہائش پذیر لوگوں کو محتاط رہنے اور نالے سے دور رہنے کی ہدایت دی ہے۔ دوسری جانب مون سون کی شدید بارشوں کا سلسلہ ملک کے مختلف علاقوں میں جاری ہے۔ لاہور، راولپنڈی، اسلام آباد سمیت کئی شہروں میں کہیں ہلکی تو کہیں تیز بارش سے نشیبی علاقے پانی میں ڈوب گئے۔
کرک اور آس پاس کے علاقوں میں موسلادھار بارش کی وجہ سے سڑکیں تالاب بن گئیں۔ خانپور ہزارہ میں ندی نالوں میں طغیانی آنے سے نشیبی علاقے متاثر ہوئے۔ شیخوپورہ میں بارش کے سبب ایک مکان کی چھت گر گئی جس کے نتیجے میں دو بچے جاں بحق ہوئے جبکہ پاکپتن میں ریسکیو ٹیم نے ملبے تلے دبے چار افراد کو زندہ نکال لیا۔
جہلم ویلی گوہرآباد میں اچانک موسلا دھار بارش (کلاؤڈ برسٹ) کے باعث گھروں، گاڑیوں اور سڑکوں کو شدید نقصان پہنچا۔ لاہور کے علاقوں گڑھی شاہو، ایبٹ روڈ، مال روڈ، اسلام پورہ، چوبرجی، اچھرہ، مسلم ٹاؤن، ماڈل ٹاؤن، گرین ٹاؤن، نشتر ٹاؤن اور جوہر ٹاؤن میں بادل خوب برسے جس سے موسم خوشگوار ہو گیا۔ پنجاب کے دیگر شہروں جیسے گوجرانوالہ، گوجر خان اور ملتان میں بھی موسلا دھار بارش ریکارڈ کی گئی۔
بلوچستان میں مون سون کے باعث پیش آنے والے مختلف حادثات میں 10 افراد جان سے ہاتھ دھو بیٹھے جبکہ 7 افراد زخمی ہوئے۔ دریائے سندھ میں کندیاں کے مقام پر نچلے درجے کا سیلاب آیا ہے۔ چشمہ بیراج پر پانی کی آمد کا بہاؤ 3 لاکھ 73 ہزار 800 کیوسک ریکارڈ کیا گیا۔
این ڈی ایم اے کے این ای او سی نے 10 جولائی تک شدید بارشوں، سیلابی صورتحال اور ممکنہ لینڈ سلائیڈنگ کے خدشے کے پیش نظر الرٹ جاری کر دیا ہے۔ الرٹ کے مطابق دریائے کابل، سندھ، چناب اور جہلم میں پانی کی سطح مزید بلند ہو سکتی ہے جبکہ دریائے سندھ پر تربیلا، کالا باغ، چشمہ اور تونسہ کے مقامات پر نچلے درجے کے سیلاب کی پیشگوئی کی گئی ہے۔
