مسرور احمد مسرور
کینیڈا میں جھیلوں کی بہتات کو دیکھتے ہوئے اسے جھیلوں کا سمندر قرار دیا گیا تھا، لیکن جب کینیڈا سے لگنے والے سمندروں کی جانب نظر دوڑائی تو کہنا پڑا کہ کینیڈا سمندروں کا بادشاہ ہے۔ یہاں ایک نہیں، دو نہیں بلکہ تین سمندروں کا عمل دخل ہے اور دنیا کی سب سے لمبی ساحلی پٹی کینیڈا میں پائی جاتی ہے۔ کینیڈا کے مشرقی ساحل پر بحر اوقیانوس (Atlantic Ocean) کینیڈا کے مغربی ساحل پر بحرالکاہل (Pacific Ocean) جب کہ شمالی ساحل پر بحر منجمد (Arctic Ocean) ہے، اس طرح یہ واحد ملک ہے جس کی سرحدیں تین مختلف سمندروں سے ملتی ہیں۔
کینیڈا کے سمندروں کے بارے میں جاننے کا خیال اس وقت آیا جب ہمیں تاریخی سیاحتی شہر وہائٹ راک تفریح کی غرض سے جانے کا موقعہ ملا۔ یہ برٹش کولمبیا کا ایک خوب صورت ساحلی شہر ہے جو وینکور کے جنوب میں امریکا کی سرحد سے بہت قریب واقع ہے۔ اس شہر کی تاریخ کا مطالعہ کیا جائے تو کچھ اس طرح کے حقائق سامنے آتے ہیں کہ قدیم مقامی لوگوں نے اس سیاحتی شہر کے قیام اور اسے آباد کرنے میں نمایاں کردار ادا کیا۔
مقامی اقوام کا یورپی آباد کاروں کی آمد سے پہلے یہ علاقہ Semiahamoo فرسٹ نیشن کا مسکن تھا، یہاں لوگ سمندر سے خوراک اور سفر کا ذریعہ اختیار کرتے تھے۔ ساحل پر موجود سفید چٹان (جس پر شہر کا نام رکھا گیا، ان لوگوں کے لیے روحانی اور ثقافتی اہمیت کی حامل تھی(
اس سفید چٹان کے حوالے سے یہ قدیم روایت ہے کہ ایک نوجوان سردار نے ایک بڑی چٹان کو سمندر میں دھکیل دیا تھا اور کہا کہ چٹان جہاں رکے گی وہ جگہ اہم ہوگی۔ یہ چٹان Semiahmoo کے ساحل پر آ کر رکی اور وہیں ٹھکانہ بنا لیا۔
19 ویں صدی کے آخر میں یہاں یورپی آباد کار آنا شروع ہو گئے تھے۔ شروع میں ماہی گیری، لکڑی کاٹنے اور زراعت جیسے کاموں سے ترقی شروع ہوئی۔
1909 میں امریکا سے آنے والی فرسٹ ناردرن ریلوے یہاں تک پہنچی جس کی وجہ سے وینکور سے رابطہ قائم ہوا، اور یہاں بسنے کے لیے رہائشی لوگوں اور سیاحوں کی آمد شروع ہوئی۔ 1914 میں سب سے پہلے وہائٹ راک پائیر تعمیر ہوا جو لوگوں کو متوجہ کرتا تھا۔
وہائٹ راک سٹی نے سرے شہر سے الگ ہو کر خود مختار بلدیہ کا درجہ حاصل کیا۔ آگے چل کر یہ ایک پسندیدہ مقام اور ساحلی شہر بن گیا ۔ یہاں کا معتدل موسم، خوب صورت ساحل اور طویل واکنگ پرومینیڈ(Promenade) کی وجہ سے پرکشش شہر بن گیا۔
وہائٹ راک پائیر کینیڈا کا سب سے طویل پائیر ہے۔
اس شہر کا نام 486 ٹن وزنی سفید چٹان پر رکھا گیا ہے جو ساحل پر موجود ہے۔ پہلے یہ پرندوں کی بیٹ سے سفید رہتی تھی، اب اسے باقاعدہ رنگ کیا جاتا ہے تاکہ اس کی پہچان برقرار رہے۔
آج وہائٹ راک کی پہچان 8 کلو میٹر طویل ساحلی راستہ ہے، فنون لطیفہ اور کھانوں کا مرکز ہے۔
پیس آرچ بارڈر کراسنگ انتہائی قریب ہے۔
