پنجاب ڈیزاسٹر مینجمنٹ اتھارٹی (پی ڈی ایم اے) نے دریائے چناب، جہلم اور راوی سمیت ان سے منسلک ندی نالوں میں سیلاب کا خطرہ ظاہر کرتے ہوئے وارننگ جاری کر دی ہے۔ حکام کے مطابق 7 سے 9 جولائی کے دوران صوبے کے دریاؤں میں پانی کی سطح خطرناک حد تک بڑھنے کا امکان ہے۔
دریائے چناب میں مرالہ کے مقام پر اونچے درجے کے سیلاب کی پیش گوئی کی گئی ہے، جبکہ راوی اور چناب کے گرد بہیں، بسنتر، ڈیگ، ایک، پلکھو، بھمبر، ہلسی اور ڈورا نالوں میں درمیانے سے شدید درجے کے سیلاب کا خدشہ ظاہر کیا گیا ہے۔
پی ڈی ایم اے نے ڈیرہ غازی خان کے رودکوہی علاقوں میں بھی اچانک آنے والے سیلاب (فلیش فلڈنگ) کی وارننگ جاری کر دی ہے۔ لاہور، گوجرانوالہ، سیالکوٹ اور راولپنڈی ڈویژن میں شہری علاقوں میں پانی بھرنے (اربن فلڈنگ) کا امکان بھی موجود ہے۔
صوبے بھر کے کمشنرز، ڈپٹی کمشنرز اور واسا سمیت تمام متعلقہ محکموں کو الرٹ رہنے اور پیشگی تیاریاں مکمل رکھنے کی ہدایات دی گئی ہیں۔ ریسکیو 1122 کو ریسپانس پلان تیار رکھنے اور فوری کارروائی کے لیے ہدایت کی گئی ہے۔
ڈی جی پی ڈی ایم اے عرفان علی کاٹھیا نے کہا ہے کہ وزیر اعلیٰ پنجاب کی ہدایات کے مطابق انتظامیہ فلڈ کنٹرول رومز کو متحرک رکھے اور ایندھن کا ذخیرہ وافر مقدار میں مہیا کیا جائے تاکہ ریسکیو آپریشن میں کوئی رکاوٹ نہ آئے۔
شہریوں کو مشورہ دیا گیا ہے کہ وہ دریاؤں کے قریب مکانات اور مویشیوں کو محفوظ مقامات پر منتقل کریں اور حکومت کی جاری کردہ حفاظتی تدابیر پر سختی سے عمل کریں۔ فلڈ ریلیف کیمپوں میں خوراک، صاف پانی اور دیگر بنیادی سہولتیں فراہم کرنے کی یقین دہانی بھی کرائی گئی ہے۔
کسی بھی ہنگامی صورتحال میں شہری پی ڈی ایم اے کی ہیلپ لائن 1129 یا ریسکیو 1122 سے فوری رابطہ کریں۔ حکومت پنجاب نے متاثرہ افراد کو ہر ممکن مدد فراہم کرنے کی یقین دہانی کروائی ہے۔
