پاکستان میں بجلی کے کرایوں میں مسلسل اضافے نے نہ صرف عام عوام کے لیے پریشانی بڑھا دی ہے بلکہ اب شوبز کی معروف شخصیات بھی اس مسئلے پر کھل کر اپنی بات کہنے لگیں ہیں۔
اداکار نعمان اعجاز نے حال ہی میں بجلی کے مہنگے نرخوں اور یونٹس کے حساب میں زیادتی پر طنزیہ انداز اپناتے ہوئے کہا ہے کہ 200 یونٹ کی بدمعاشی کو ختم کیا جانا چاہیے۔
نیشنل الیکٹرک پاور ریگولیٹری اتھارٹی (نیپرا) نے حال ہی میں گھریلو صارفین کے لیے بجلی کے مختلف یونٹس پر نئے ٹیرفز کا اعلان کیا ہے۔
اب ایک سے 100 یونٹس تک کے استعمال پر فی یونٹ 10.54 روپے، 101 سے 200 یونٹس کے لیے 13 روپے، جبکہ نان پروٹیکٹڈ صارفین کے لیے 22.44 روپے فی یونٹ چارج کیا جائے گا۔ 201 یونٹس سے زیادہ کے استعمال پر نرخ 28.91 سے 47.69 روپے فی یونٹ کے درمیان ہوں گے جو کہ استعمال کے مطابق مختلف ہوں گے۔
یہ تبدیلیاں حکومت کی منظوری کے بعد نافذ العمل ہوں گی۔
نعمان اعجاز نے اس حوالے سے سوشل میڈیا پر ایک پیغام شیئر کیا جس میں کہا گیا کہ اس شدید گرمی میں عام انسان کبھی میٹر، کبھی سورج، اور کبھی اپنے بچوں کی طرف دیکھ کر پریشان ہوتا ہے۔
انہوں نے اپیل کی کہ براہ کرم عوام پر رحم کریں اور 200 یونٹ کی اس زیادتی کو فوری ختم کریں۔
