پاکستان میں عمومی طور پر سرد موسم کیلئے معروف گلگت بلتستان کا ضلع چلاس غیر معمولی طور پر ملک کا سب سے زیادہ گرم علاقہ بن گیا۔ موسمی ماہرین کے مطابق چلاس میں ہفتے کے روز درجہ حرارت 49 ڈگری سینٹی گریڈ تک پہنچ گیا، جو اس دن ملک بھر میں سب سے زیادہ تھا۔ ماہرین موسمیات اس صورتحال کو موسمیاتی تبدیلیوں کی سنگین علامت قرار دے رہے ہیں۔
دوسری جانب، ملک بھر میں مون سون کا تازہ سلسلہ داخل ہو چکا ہے جس کے تحت کئی علاقوں میں تیز بارشوں کی پیشگوئی کی گئی ہے۔ محکمہ موسمیات نے بتایا ہے کہ پنجاب کے مختلف حصوں، بشمول لاہور، میں موسلادھار بارش متوقع ہے۔ لاہور میں دن بھر حبس اور گرمی برقرار رہنے کے بعد رات کو گرج چمک کے ساتھ بارش ہونے کا امکان ہے، جہاں کم از کم درجہ حرارت 30 جبکہ زیادہ سے زیادہ 37 ڈگری سینٹی گریڈ تک رہنے کی توقع ہے۔
محکمہ موسمیات نے شہریوں کو خبردار کیا ہے کہ کہیں ہلکی اور کہیں شدید بارش ہو سکتی ہے۔ مون سون کا بارش برسانے والا سسٹم دوبارہ ملک میں سرگرم ہو گیا ہے جس سے مزید تیز ہوائیں اور بارشیں متوقع ہیں۔
علاوہ ازیں، لاہور میں ترقیاتی منصوبوں کی سست رفتاری پر شہریوں نے تشویش کا اظہار کیا ہے اور کہا ہے کہ اگر کام جلد مکمل نہ ہوئے تو بارشوں کے دوران مشکلات پیش آ سکتی ہیں۔ اس دوران پی ڈی ایم اے نے یوم عاشور کے موقع پر ممکنہ بارشوں کی وجہ سے الرٹ جاری کر دیا ہے۔ ترجمان کے مطابق 10 محرم کو لاہور، راولپنڈی، گوجرانوالہ، گجرات، سیالکوٹ، سرگودھا اور فیصل آباد سمیت متعدد اضلاع میں موسلا دھار بارشیں ہو سکتی ہیں۔
ماہرین کے مطابق مون سون کی موجودہ لہر 10 جولائی تک جاری رہنے کی توقع ہے، جس سے دریاؤں اور ندی نالوں میں پانی کی سطح بڑھ سکتی ہے۔ اسی لیے ریسکیو 1122 کو ہائی الرٹ پر رکھا گیا ہے اور ڈیزاسٹر ریسپانس فورس کو بھی ضروری ساز و سامان سمیت تیار رہنے کی ہدایات دی گئی ہیں۔ شہریوں سے اپیل کی گئی ہے کہ کسی بھی ہنگامی صورتحال میں احتیاطی تدابیر اختیار کریں اور فوری طور پر پی ڈی ایم اے پنجاب کی ہیلپ لائن 1129 پر رابطہ کریں۔
