ریاست ٹیکساس میں طوفانی بارشوں کے باعث آنے والے شدید سیلاب نے تباہی مچا دی، جس کے بعد امدادی ٹیمیں دریائی کنارے لگے ایک سمر کیمپ سے کم از کم 20 لاپتا بچیوں کو ڈھونڈنے میں مصروف ہیں۔
کیر کاؤنٹی کے شیرف لیری لیتھا نے بتایا کہ اب تک ہلاکتوں کی تعداد 24 تک پہنچ گئی ہے جبکہ امدادی اہلکار سان انتونیو کے شمال مغرب میں متاثرہ علاقوں میں پھنسے لوگوں کو نکالنے کی کوششوں میں مصروف ہیں۔ نائب گورنر ڈین پیٹرک کے مطابق جاں بحق افراد میں بچے بھی شامل ہیں۔
شیرف نے کہا کہ تقریباً 23 سے 25 افراد اب بھی لاپتا ہیں۔ لاپتا بچیاں کیمپ ’مسٹک‘ کا حصہ تھیں جو گواڈیلوپ دریا کے کنارے لگایا گیا تھا۔
بارش اتنی شدید تھی کہ دریا کا پانی صرف 45 منٹ میں 26 فٹ تک بلند ہو گیا۔ نائب گورنر پیٹرک کا کہنا تھا کہ ضروری نہیں کہ سب بچیاں جاں بحق ہو چکی ہوں، ممکن ہے وہ درختوں پر پناہ لیے ہوں۔
ٹیکساس کے گورنر گریگ ایبٹ نے متاثرہ علاقوں میں ایمرجنسی نافذ کر دی ہے اور وسائل بڑھانے کے احکامات جاری کیے ہیں۔
صدر ڈونلڈ ٹرمپ نے اس صورتحال کو ’خوفناک‘ قرار دیا اور وفاقی امداد کی یقین دہانی کرائی۔
امدادی آپریشن میں تقریباً 500 اہلکار اور 14 ہیلی کاپٹر حصہ لے رہے ہیں۔ نیشنل گارڈ کے میجر جنرل ٹامس سوئلزر کے مطابق اب تک کم از کم 237 افراد کو بچایا جا چکا ہے جن میں سے 167 کو ہیلی کاپٹر کے ذریعے نکالا گیا۔
ریاستی پبلک سیفٹی کے سربراہ فری مین مارٹن نے بتایا کہ خراب موسم نے ریسکیو ٹیموں کی کوششوں میں رکاوٹ ڈالی لیکن جیسے جیسے موسم بہتر ہوا، امدادی سرگرمیوں میں تیزی آئی۔
حکام نے عوام کو متاثرہ علاقوں کا سفر نہ کرنے کی ہدایت کی ہے کیونکہ کئی سڑکیں زیرِ آب آ چکی ہیں۔ سوشل میڈیا پر سامنے آنے والی ویڈیوز میں گھروں اور درختوں کو تیز سیلابی ریلے میں بہتے دیکھا جا سکتا ہے۔
گزشتہ رات 12 انچ تک بارش ہوئی جو کیر کاؤنٹی کی سالانہ اوسط بارش کا ایک تہائی حصہ بنتی ہے۔
گورنر ایبٹ نے ایک ویڈیو بھی شیئر کی جس میں ایک متاثرہ شخص کو درخت کی چوٹی سے بچایا جا رہا ہے۔ انہوں نے کہا کہ ایئر ریسکیو آپریشنز جاری رہیں گے جب تک ہر لاپتا فرد کا سراغ نہیں مل جاتا۔
یاد رہے کہ جون کے وسط میں بھی سان انتونیو میں اچانک سیلاب کے باعث کم از کم 10 افراد جان کی بازی ہار گئے تھے۔
