آسٹریلوی اداکار جولیان میک موہن، جو ’نپ/ٹک‘، ’چارمڈ‘ اور ’فنٹاسٹک فور‘ جیسے مقبول شوز اور فلموں سے شہرت رکھتے تھے، طویل عرصے تک کینسر سے نبرد آزما رہنے کے بعد 2 جولائی 2025 کو 56 برس کی عمر میں چل بسے۔
جولیان میک موہن سابق آسٹریلوی وزیراعظم سر ولیم میک موہن کے صاحبزادے تھے۔ ان کی اہلیہ کیلی میک موہن نے 4 جولائی کو ان کے انتقال کی خبر میڈیا کو دی۔ ان کا کہنا تھا کہ جولیان فلوریڈا کے شہر کلیئرواٹر میں انتقال کرگئے۔ کینسر کی قسم سے متعلق کوئی تفصیل جاری نہیں کی گئی۔
کیلی میک موہن نے اپنے بیان میں کہا: ’’انتہائی افسوس کے ساتھ دنیا کو بتانا چاہتی ہوں کہ میرے پیارے شوہر جولیان میک موہن اس ہفتے کینسر کے خلاف طویل اور بہادرانہ جنگ لڑتے لڑتے چل بسے۔ جولیان کو زندگی سے بے پناہ محبت تھی۔ وہ اپنے اہل خانہ، دوستوں، اپنے کام اور مداحوں کے بہت قریب تھے۔ ان کی ہمیشہ یہی خواہش رہی کہ وہ زیادہ سے زیادہ لوگوں کی زندگیوں میں خوشی بانٹیں۔‘‘
