بھارت میں پاکستانی فنکاروں کے سوشل میڈیا اکاؤنٹس کو مختصر عرصے کے لیے بحال کرنے کے بعد دوبارہ بلاک کر دیا گیا۔ تفصیلات کے مطابق جمعرات کے روز بھارتی حکومت نے ہانیہ عامر، ماہرہ خان، شاہد آفریدی، ماورا حسین اور فواد خان سمیت کئی معروف پاکستانی شخصیات کے انسٹاگرام اور ایکس (سابقہ ٹوئٹر) پروفائلز دوبارہ بند کر دیے ہیں۔
اس سے ایک دن پہلے متعدد پاکستانی یوٹیوب چینلز اور انسٹاگرام اکاؤنٹس بھارت میں عارضی طور پر کھول دیے گئے تھے، جس کے بعد بھارتی مداح ان فنکاروں کے اکاؤنٹس تک رسائی حاصل کر سکے تھے۔ ان اکاؤنٹس میں کچھ پاکستانی ٹی وی چینلز کے صفحات بھی شامل تھے۔
اطلاعات کے مطابق 2 جولائی کو صبا قمر، ماورا حسین، فواد خان، شاہد آفریدی، احد رضا میر، یمنہ زیدی اور دانش تیمور سمیت کئی فنکاروں کے انسٹاگرام اکاؤنٹس بھارت میں دوبارہ فعال ہو گئے تھے، جس پر بھارتی مداحوں نے خوشی کا اظہار کیا اور قیاس کیا جانے لگا کہ شاید پابندیاں ہٹا لی گئی ہیں۔
تاہم جمعرات کو بھارتی صارفین نے جب دوبارہ ان اکاؤنٹس تک رسائی کی کوشش کی تو انہیں پیغام موصول ہوا کہ یہ اکاؤنٹس بھارت میں دستیاب نہیں ہیں اور قانونی درخواست کی بنیاد پر بلاک کیے گئے ہیں۔ اس صورت حال پر بھارتی حکومت یا وزارت اطلاعات کی جانب سے تاحال کوئی سرکاری وضاحت سامنے نہیں آئی۔
