بالی ووڈ کے سینئر فنکار نصیرالدین شاہ نے حالیہ تنازع میں پنجابی گلوکار اور اداکار دلجیت دوسانجھ کی حمایت کر دی ہے۔ دلجیت کی پاکستانی اداکارہ ہانیہ عامر کے ساتھ نئی فلم ‘سردار جی 3’ حال ہی میں ریلیز ہوئی ہے، جس نے باکس آفس پر شاندار کمائی کی، لیکن فلم کی ریلیز سے پہلے ہی بھارت میں تنقید کا طوفان کھڑا ہو چکا تھا۔
پاک بھارت تعلقات کی کشیدہ فضا میں ہانیہ عامر کے ساتھ دلجیت کی جوڑی پر کئی حلقوں کی جانب سے سخت اعتراضات اٹھائے جا رہے ہیں۔ بھارتی فلم انڈسٹری کی کچھ تنظیموں اور سوشل میڈیا صارفین نے بھی اس پر خوب تنقید کی۔
ایسے میں نصیرالدین شاہ نے دلجیت کے دفاع میں کھل کر بیان دیا ہے۔ ان کا کہنا ہے کہ دلجیت فلم کی کاسٹنگ کے ذمہ دار نہیں بلکہ یہ ہدایت کار کی ذمہ داری تھی، مگر لوگ دلجیت پر انگلی اٹھا رہے ہیں کیونکہ وہ مقبول ہیں، جبکہ اصل فیصلہ کرنے والا کوئی نہیں جانتا۔
نصیرالدین شاہ نے کہا کہ انتہا پسند عناصر ہندوستان اور پاکستان کے لوگوں کے درمیان محبت اور ذاتی رشتے ختم کرنا چاہتے ہیں، لیکن وہ اپنی کوششوں میں کامیاب نہیں ہوں گے۔ انہوں نے پاکستان میں موجود اپنے عزیزوں اور دوستوں کے لیے بھی محبت کا پیغام دیا۔
