اقوام متحدہ کے ہائی کمشنر برائے انسانی حقوق، وولکر ترک، نے عالمی برادری پر زور دیا ہے کہ وہ موسمیاتی تبدیلی کے منفی اثرات کو روکنے کے لیے فوری اور مؤثر اقدامات کرے تاکہ لوگوں کے بنیادی حقوق کا تحفظ ممکن ہو سکے۔ جنیوا میں اقوام متحدہ کی کونسل برائے انسانی حقوق کے اجلاس سے خطاب میں انہوں نے رکن ممالک سے سوال کیا کہ آیا موسمیاتی تبدیلی سے بچاؤ کے لیے مناسب تدابیر اختیار کی گئی ہیں۔
ہائی کمشنر نے کہا کہ دنیا کو ماحول کے لیے نقصان دہ سرگرمیوں کو ماحول دوست متبادلات سے تبدیل کرنا ہوگا اور ایسی پالیسیز اپنانی ہوں گی جو ہر فرد کو شامل کریں تاکہ کوئی پیچھے نہ رہ جائے۔ انہوں نے خبردار کیا کہ اگر لوگوں کی زندگی، صحت، اور روزگار کا تحفظ نہ کیا گیا تو موسمیاتی تبدیلی ناانصافی اور عدم مساوات میں مزید اضافہ کرے گی۔
