سندھ ہائیکورٹ نے نجی کمپنی سے 53 کروڑ سے زائد کے بینک فراڈ کیس میں معروف ماڈل و اداکارہ نادیہ حسین کے شوہر ملزم عاطف خان اور دیگر ملزمان کی درخواست ضمانت مسترد کرتے ہوئے سماعت 21 جولائی تک ملتوی کردی۔
ڈان نیوز کے مطابق سندھ ہائیکورٹ میں نجی کمپنی سے 53 کروڑ سے زائد کے بینک فراڈ کیس میں معروف اداکارہ کے شوہر ملزم عاطف خان اور دیگر ملزمان کی درخواست ضمانت پر سماعت ہوئی۔
جونیئر وکیل نے عدالت میں استدعا کی کہ مرکزی ملزم عاطف کے سینئر وکیل مصروف ہیں، سماعت ملتوی کی جائے۔
انہوں نے کہا کہ عدالت نے ماڈل نادیہ حسین کی ضمانت میں توثیق کردی تھی، عاطف خان جیل میں ہیں، جب کہ ملزم امتیاز اور فیصل احاطہ عدالت سے فرار ہوگئے تھے۔
امتیاز اور فیصل نے گرفتاری سے بچنے کے لیے سندھ ہائیکورٹ سے ضمانت حاصل کرلی تھی۔
جسٹس محمود اے خان نے کہا کہ ہم تینوں ملزمان کی درخواست ضمانت کو ایک ساتھ سنیں گے، بعد ازاں عدالت نے مزید سماعت 21 جولائی تک ملتوی کر دی۔
یاد رہے کہ نادیہ حسین نے شوہر کی گرفتاری کے بعد ایک ویڈیو شیئر کرکے وفاقی تحقیقاتی ادارے (ایف آئی اے) کے افسران پر رشوت طلب کرنے کا الزام عائد کیا تھا، جس کے بعد ایف آئی اے کی جانب سے نادیہ حسین کیخلاف پریونشن آف الیکٹرانک کرائمز ایکٹ (پیکا) کے تحت مقدمہ درج کیا تھا۔
بعد ازاں نادیہ حسین نے وضاحت کی تھی کہ ان کی نیت ایف آئی اے کے افسران کو بدنام کرنے کی نہیں تھی، انہیں فون کال موصول ہوئی، جس میں پیسے مانگے گئے تھے، ان کے علم میں نہیں تھا کہ وہ کال کسی جعلساز نے کی تھی۔
