پریس ریلیز
وفاق ایوانہائے تجارت وصنعت۔ پاکستان
کراچی (30جون 2025): صدر ایف پی سی سی آئی،عاطف اکرام شیخ نے آگاہ کیا ہے کہ پاکستان سنگل ونڈو (PSW) کے چیف ایگزیکٹو آفیسر، سید آفتاب حیدر نے فیڈریشن ہاؤس کا دورہ کیا ہے اور اس موقع پر انہوں نے تفصیلی بریفنگ بھی دی اور ایک مشاورتی و انٹرایکٹو سیشن کا انعقاد کیاگیا۔ جس میں حکومت کی جانب سے کسٹمز کے عمل کو ڈیجیٹائز کرنے اور آسان بنانے کی کوششوں پر روشنی ڈالی گئی؛ جو کہ ورلڈ ٹر یڈ آرگنائزیشن (WTO) کے اصولوں اور بین الاقوامی بہترین طریقہ کار کے مطابق ہوں۔صدر ایف پی سی سی آئی عاطف اکرام شیخ نے اس امر پر زور دیا کہ پاکستان کی کاروباری، صنعتی، تجارتی اور سروسز کمیونٹی میں PSW کی سہولیات، خدمات اور اب تک کی پیشرفت کے بارے میں بھرپور آگاہی پیدا کی جائے؛ تاکہ،پری آرائیول جی ڈی کے موجودہ استعمال سے کہیں زیادہ، بہتر اور وسیع پیمانے پر PSW سے فائدہ اٹھایا جا سکے۔ایف پی سی سی آئی کے سینئر نائب صدر ثاقب فیاض مگوں نے وضاحت کی کہ PSW کا مقصد ایک ایسا واحد الیکٹرانک پلیٹ فارم قائم کرنا ہے کہ جو درآمدات، برآمدات اور ٹرانزٹ ٹریڈ سے متعلقہ تمام ضروریات کو مؤثر، شفاف اور بغیر کسی رکاوٹ کے پورا کر سکے۔ ساتھ ہی ساتھ، تجارتی عمل کو آسان، ہم آہنگ اور مکمل طور پر ڈیجیٹائز کیا جا سکے۔نائب صدر ایف پی سی سی آئی آصف سخی نے آگاہ کیا کہ ایف پی سی سی آئی کی سفارش پر حکومتی مشینری اور PSW نے 8 جولائی 2025 سے جی ڈی پر ایڈوانس پیمنٹس ختم کرنے کا فیصلہ کیا ہے۔ انہوں نے مزید کہا کہ ایڈوانس پیمپنٹس کا یہ عمل بین الاقوامی اصولوں اور تجارتی فروغ کی روح کے خلاف بھی تھا۔PSW کے سی ای او سید آفتاب حیدر نے بتایا کہ پاکستان اپنے تجارت میں سہولت اور علاقائی رابطے کے ایجنڈے کے تحت اپنی کراس-بارڈر تجارت کے انفراسٹرکچر میں جاری سرمایہ کاری کے ساتھ ہم آہنگی کے لیے اپنے نظام کو جدید، خودکار اور بہتر بنانے کے لیے پرعزم ہے۔ واضح رہے کہ،پاکستان نے 27 اکتوبر 2015 کو WTO کے ٹریڈ فسیلیٹیشن ایگریمنٹ کی توثیق کی تھی اور PSW اس معاہدے پر عملدرآمد میں ملک کی مدد کر رہی ہے۔انہوں نے مزید کہا کہ ایف پی سی سی آئی کے مطالبے پر PSW کی فیس جو کہ 500 رو پے تھی وہ ختم کی جا رہی ہے؛ تاکہ اس کے یوزرز کی تعداد میں اضافہ ہو اور وہ اس کی خدمات سے مکمل استفادہ کر سکیں۔ اب تک 22 سرکاری محکمے PSW سے منسلک ہو چکے ہیں؛ 94 ہزار سے زائد یوزرز PSW سے رجسٹرڈ ہو چکے ہیں اور اب تک 10 لاکھ سے زائد دستاویزات PSW کے ذریعے پراسیس کی جا چکی ہیں۔ مزید 77 متعلقہ محکموں کو جلد ہی PSW سے منسلک کیا جائے گا۔ایف پی سی سی آئی کی ایڈوائزری کونسل برائے کسٹمز کے چیئرمین اور PSW کے نجی شعبے کی نمائندگی کرنے والے ڈائریکٹر، خرم اعجاز نے بتایا کہ PSW کا مقصد تجارتی عمل کو شفاف بنانا؛ تجارتی اخراجات و تاخیر میں کمی لانا؛ بینکنگ آپریشنز کو سہل بنانا؛ انٹیگریٹڈ ڈکلیریشن اور کسٹمز کی کاروائی کو خودکار بنانا؛ ای ڈی آئی (Electronic Data Interchange) کے ذریعے ریئل ٹائم ڈیٹا کا تبادلہ ممکن بنانا؛ سرکاری محکموں کے درمیان پیپرلیس پراسیسنگ؛ خواتین تاجروں کے لیے آسان کاروباری مواقع فراہم کرنا اور برآمدات اور غیر ملکی سرمایہ کاری میں اضافہ کرنا ہونا چا ہیے۔
بریگیڈیئر افتخار اوپل، ایس آئی (ایم)، ریٹائرڈ۔
سیکرٹری جنرل ایف پی سی سی آئی
