چینی حکام نے لیتھیم بیٹریوں سے چلنے والے گیجٹس میں آتشزدگی کے بڑھتے واقعات کے پیشِ نظر ملکی پروازوں پر غیر تصدیق شدہ پاور بینکس لے جانے پر مکمل پابندی لگا دی ہے۔
مقامی میڈیا کے مطابق، چین کی سول ایوی ایشن ایڈمنسٹریشن نے باقاعدہ ہدایات جاری کی ہیں کہ اب مسافر صرف وہی پاور بینک ساتھ رکھ سکیں گے جو چین کے لازمی سرٹیفکیشن سسٹم
(3C)
سے منظور شدہ ہوں گے۔
حکام کے مطابق ایسے پاور بینکس جن کی لیبلنگ غیر واضح ہو یا جو ماڈل کمپنی کی جانب سے واپس منگوائے جا چکے ہوں، وہ بھی اس پابندی کی زد میں آئیں گے۔
یہ فیصلہ اس وقت سامنے آیا جب حالیہ دنوں میں لیتھیم بیٹری سے چلنے والی دو بڑی مصنوعات کو حفاظتی خطرات کے باعث مارکیٹ سے ہٹانا پڑا۔
رپورٹس کے مطابق رواں ماہ شینزین کی مشہور کمپنی روموس کو اپنے تقریباً 4 لاکھ 92 ہزار پاور بینک یونٹس واپس بلانے پڑے کیونکہ متعدد چینی یونیورسٹیوں میں ان سے آگ لگنے کے واقعات سامنے آئے تھے۔ متاثرہ پاور بینک جون 2023 سے جولائی 2024 کے درمیان تیار کیے گئے تھے۔
اسی طرح مشہور بین الاقوامی الیکٹرانکس برانڈ اینکر انوویشنز نے بھی بیٹری سیل کی خرابی کے باعث اپنے 7 لاکھ 10 ہزار پاور بینکس دنیا بھر سے واپس منگوانے کا اعلان کیا ہے۔
انتظامیہ کے مطابق یہ اقدامات طیاروں میں آگ لگنے کے خطرے کو کم کرنے اور مسافروں کی حفاظت کو یقینی بنانے کے لیے اٹھائے گئے ہیں۔
