Report Sabih Salik
چین کے شہر گوانگ ژی میں شدید سیلاب کے دوران ایک نوجوان کو صرف ایک منٹ میں ڈرون کے ذریعے ریسکیو کر لیا گیا، جس کی ویڈیو نے دنیا بھر میں لوگوں کو حیرت زدہ کر دیا ہے۔
جنوبی چین کے علاقوں یونان، گوئی ژو، گوانگ ژی اور حائنان میں گزشتہ دو دنوں میں بارشوں کے باعث 13 اہم دریا طوفانی حد سے اوپر پہنچ گئے اور پانی کی سطح انتباہی حد سے تجاوز کر گئی۔
چین کی سرکاری ٹی وی کے مطابق ملک میں شدید بارشوں اور سیلاب کی وجہ سے تقریباً ایک لاکھ 80 ہزار افراد متاثر ہوئے، جن میں سے 68 ہزار سے زائد شہریوں کو محفوظ مقامات پر منتقل کیا جا چکا ہے۔
مقامی اور صوبائی حکام نے ہزاروں امدادی کارکنوں کو تعینات کیا ہے جو ملبہ ہٹانے، سڑکوں کی مرمت اور بنیادی ڈھانچے کی بحالی میں مصروف ہیں۔
اسی دوران گوانگ ژی میں ایک نوجوان کو ریسکیو کرنے کا واقعہ سامنے آیا، جہاں ایک ہیوی لفٹر ڈرون نے تیز پانی میں پھنسے ہوئے لڑکے کو ایک منٹ کے اندر محفوظ مقام تک پہنچایا۔
چینی میڈیا کے مطابق یہ جدید ڈرون تقریباً 100 کلوگرام وزن اٹھانے کی صلاحیت رکھتا ہے اور چین سیلاب زدگان کی مدد کے لیے تکنیکی جدید آلات کا بھرپور استعمال کر رہا ہے۔
نوجوان کو ڈرون کے ذریعے بچانے کی یہ ویڈیو سوشل میڈیا پر تیزی سے وائرل ہو رہی ہے اور دیکھنے والوں نے اس کارنامے پر حیرت اور تعریف کا اظہار کیا ہے۔
