ایشیا کپ 2025 کا ممکنہ شیڈول سامنے آ گیا

ایشیا کپ 2025 کے انعقاد پر چھائی غیر یقینی کی فضا اب قدرے ختم ہوتی دکھائی دے رہی ہے، اور ٹی ٹوئنٹی فارمیٹ میں کھیلے جانے والے اس ایونٹ کا ممکنہ شیڈول بھی منظرِ عام پر آ گیا ہے۔ شائقین کرکٹ اس بار خاص طور پر اس ایونٹ کا بے چینی سے انتظار کر رہے ہیں کیونکہ ایشیا کپ رواں برس ٹی ٹوئنٹی طرز میں کھیلا جائے گا، جو آئندہ سال ہونے والے ورلڈ کپ کی تیاریوں کا بھی حصہ ہے۔

ذرائع کے مطابق اس بار ایشیا کپ کی میزبانی بھارت کرے گا، لیکن میچز متحدہ عرب امارات کے میدانوں میں کھیلے جانے کا امکان ہے۔ ایونٹ 12 ستمبر سے 28 ستمبر تک جاری رہنے کی توقع ہے، جس میں پاکستان، بھارت سمیت چھ ایشیائی ٹیمیں شریک ہوں گی۔

پاکستان اور بھارت کے درمیان حالیہ کشیدگی اور تناؤ کے باعث ایونٹ کے انعقاد پر شکوک و شبہات تھے، تاہم پہلگام واقعے سے قبل چیمپئنز ٹرافی کے فائنل میں بھی ایشیائی بورڈز کے حکام کے درمیان اس حوالے سے گفتگو ہو چکی ہے۔

ذرائع کا کہنا ہے کہ بھارت نے ایونٹ کی میزبانی کی ذمہ داری اپنے کرکٹ بورڈ کے نائب صدر راجیو شکلا کو سونپ دی ہے۔ دفاعی چیمپئن بھارت اس بار بھی ایونٹ کا میزبان ہوگا، لیکن سیکیورٹی خدشات کے باعث یو اے ای میں میچز کرانے کا فیصلہ کیا گیا ہے۔