صوبہ پنجاب کے ضلع پاکپتن کے ڈسٹرکٹ اسپتال میں محض چھ دنوں کے دوران 20 نومولود بچوں کی ہلاکت کے افسوسناک واقعے کی ابتدائی تحقیقات میں ڈاکٹرز اور نرسنگ اسٹاف کو کلین چٹ دے دی گئی ہے۔
تفصیلات کے مطابق 16 سے 22 جون کے درمیان اسپتال میں داخل 20 نومولود اپنی جان کی بازی ہار گئے۔ متاثرہ بچوں کے لواحقین کا الزام ہے کہ بچوں کی اموات آکسیجن کی کمی اور طبی عملے کی مبینہ نااہلی کی وجہ سے ہوئیں، تاہم ابتدائی رپورٹ میں عملے کو ذمہ دار قرار نہیں دیا گیا بلکہ عملے کی مزید تربیت کی سفارش کی گئی ہے۔
واقعے کا نوٹس لیتے ہوئے کمشنر ساہیوال نے 3 رکنی انکوائری کمیٹی تشکیل دے دی ہے جو 2 جولائی تک اپنی رپورٹ جمع کرائے گی۔ یاد رہے کہ پاکپتن اسپتال میں حالیہ دنوں میں بنیادی طبی سہولیات کی کمی اور ممکنہ غفلت کے باعث بچوں کی اموات کا انکشاف ہونے پر سول سوسائٹی اور میڈیا میں شدید تشویش اور غم و غصہ دیکھنے میں آیا ہے۔
