Report Sabih Salik
پاکستانی فنکار یمنیٰ زیدی اور اسامہ خان کی فلم نایاب کو شنگھائی تعاون تنظیم
(SCO)
فلم فیسٹیول 2025 میں مقابلے کے لیے چُن لیا گیا ہے۔ یہ فلم فیسٹیول شنگھائی تعاون تنظیم کے سربراہی اجلاس کے موقع پر منعقد کیا جاتا ہے، جس کا مقصد رکن ممالک کے درمیان ثقافتی تعلقات کو مضبوط بنانا اور فلمی صنعت کو فروغ دینا ہے۔
نایاب کی بین الاقوامی سطح پر شمولیت پاکستانی فلم انڈسٹری کے لیے ایک خوش آئند قدم ہے، جسے ملکی سینما کی تخلیقی صلاحیتوں کا اعتراف بھی قرار دیا جا رہا ہے۔ اس انتخاب کے بعد نایاب کو عالمی اسٹیج پر اپنی کہانی سنانے کا موقع ملے گا۔
واضح رہے کہ ایس سی او فلم فیسٹیول میں رکن ممالک کی منتخب فلمیں ثقافتی تنوع کو اجاگر کرتی ہیں اور مختلف معاشروں کی کہانیاں دنیا تک پہنچاتی ہیں۔ اس پلیٹ فارم سے پاکستانی فلموں کو عالمی سطح پر پذیرائی ملنے کی امید ہے۔
یمنیٰ زیدی کی یہ فلم اس سے پہلے بھی مختلف ایوارڈز جیت چکی ہے۔ گزشتہ سال نایاب نے فرانس میں ہونے والے ’ورلڈ کانز فلم فیسٹیول‘ میں دو اعزازات اپنے نام کیے تھے۔
نایاب کی کہانی کراچی کی ایک لڑکی کی جدوجہد پر مبنی ہے جو پیشے کے طور پر کرکٹ کھیلنے کا خواب دیکھتی ہے مگر معاشرتی رکاوٹیں اس کے راستے میں آتی ہیں۔ فلم میں یہ کردار یمنیٰ زیدی نے ادا کیا ہے اور شائقین کی طرف سے اسے بے حد سراہا گیا ہے۔
Ask ChatGPT
