ملک بھر میں آج پھر کہیں کہیں بارش کا امکان
ملک بھر میں آج پھر کہیں کہیں بارش کا امکان
آج سندھ ، پنجاب، بلوچستان کے بعض علاقوں، خیبرپختونخوا اور کشمیر میں کہیں کہیں بارش کا امکان ہے، چند مقامات پر موسلادھار بارش بھی ہو سکتی ہے۔
محکمہ موسمیات کے مطابق شدید بارشوں کے باعث کراچی، حیدرآباد، سکھر، لاڑکانہ، میرپور خاص، ٹھٹھہ اور بدین کے نشیبی علاقے زیر آب آنے کا اندیشہ ہے۔
موسلادھار بارش سے ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ہے۔
گزشتہ 24 گھنٹوں میں سب سے زیادہ بارش مٹھی میں 53 ملی میٹر ریکارڈ کی گئی۔
====================
خیبر پختونخوا: سیلاب سے 11 افراد جاں بحق، 6 زخمی
خیبر پختون خوا میں مون سون بارشوں سے نقصانات کی ابتدائی رپورٹ تیار کر لی گئی ہے۔
پشاور سے پروونشل ڈیزاسسٹر مینجمنٹ اتھارٹی کی رپورٹ کے مطابق سیلاب کے باعث 11 افراد جاں بحق اور 6 زخمی ہوئے ہیں۔
پی ڈی ایم اے کی رپورٹ کے مطابق جاں بحق افراد میں 4 مرد، 3 خواتین اور 4 بچے شامل ہیں، بارشوں اور سیلاب سے سوات میں زیادہ نقصان ہوا ہے۔
پی ڈی ایم اے کی رپورٹ کے مطابق سوات میں سیلاب اور لینڈ سلائیڈنگ سے 10 افراد جاں بحق اور 6 زخمی ہوئے، متاثرہ علاقوں میں 56 گھروں کو نقصان پہنچا۔
پی ڈی ایم اے کی رپورٹ کے مطابق 6 مکمل طور پر 50 گھروں کو جزوی طور پر نقصان پہنچا ہے، سیلاب کے نتیجے میں انفرااسٹرکچر کو شدید نقصان پہنچا ہے، صوبے بھر میں مون سون بارشوں کا آغاز ہو چکا ہے۔
پی ڈی ایم اے کی رپورٹ کے مطابق دریائے سوات میں خوازہ خیلہ کے مقام پر سیلابی صورتِ حال ہے۔
پی ڈی ایم اے کی رپورٹ کے مطابق سیلابی خدشے کے پیشِ نظر ضلعی انتظامیہ نوشہرہ اور چارسدہ کو بھی الرٹ جاری کیا گیا ہے۔
پی ڈی ایم اے نے ہدایت کی ہے کہ ضلعی انتظامیہ ممکنہ طور سیلاب سے قبل پیشگی حفاظتی اقدامات یقینی بنائے۔
