Report Sabih Salik
معروف بھارتی گلوکار اور اداکار دلجیت دوسانجھ نے اپنی نئی فلم “سردار جی 3” پر بڑھتی ہوئی تنقید، ممکنہ پابندیوں اور پاکستانی اداکارہ ہانیہ عامر کے ساتھ کام کرنے کے حوالے سے لب کشائی کی ہے۔
بی بی سی ایشین نیٹ ورک کو دیے گئے ایک انٹرویو میں دلجیت دوسانجھ اور ان کی ساتھی اداکارہ نیرو باجواہ نے فلم سے متعلق کئی پہلوؤں پر بات کی۔ میزبان نے جب دلجیت سے ہانیہ عامر کے ساتھ کام کرنے کے تجربے پر سوال کیا تو انہوں نے بھرپور انداز میں اداکارہ کی پیشہ ورانہ صلاحیتوں کو سراہا۔
دلجیت کا کہنا تھا
“ہانیہ عامر ایک نہایت پروفیشنل اداکارہ ہیں، اسکرین پر ہماری کیمسٹری دیکھ کر لوگ سمجھتے ہیں کہ ہم آف اسکرین بھی بہت قریب ہیں، لیکن حقیقت میں وہ بہت سنجیدہ اور اپنے کام پر فوکس رکھنے والی فنکارہ ہیں۔”
دلجیت نے فلم پر جاری تنازع کے تناظر میں واضح کیا کہ ہانیہ عامر کی کاسٹنگ تنازع سے قبل ہوئی تھی۔
انہوں نے کہا
“جب فلم شوٹ کی گئی، اُس وقت پاک بھارت کشیدگی موجود نہیں تھی۔ فلم کے پروڈیوسر نے عوامی جذبات کا خیال رکھتے ہوئے فلم کو بھارت میں ریلیز نہ کرنے کا فیصلہ کیا ہے، البتہ یہ فلم بیرون ممالک میں ریلیز کی جائے گی تاکہ نقصان سے بچا جا سکے۔”
دلجیت نے یہ بھی انکشاف کیا کہ فلم کا ٹریلر یوٹیوب انڈیا پر موجود نہیں تاکہ بھارتی عوام کی حساسیت کو مدنظر رکھا جا سکے۔
“سردار جی 3” اب 27 جون کو بھارت کے علاوہ دیگر ممالک میں ریلیز کی جائے گی۔ تاہم پاکستان میں اس فلم کی ریلیز سے متعلق ابھی کوئی واضح اعلان سامنے نہیں آیا۔
