لاہور: صوبائی دارالحکومت میں آج مختلف علاقوں میں موسلادھار بارش ہوئی، جس کے بعد گرمی اور حبس کا زور ٹوٹ گیا اور موسم خوشگوار ہو گیا۔
ایبٹ روڈ، لکشمی چوک، شملہ پہاڑی، فیروزپور روڈ، کلمہ چوک، کینال روڈ، مال روڈ، انارکلی، جیل روڈ، گلشن راوی، اسلام پورہ اور سبزہ زار سمیت متعدد علاقوں میں تیز ہواؤں کے ساتھ بارش ہوئی، جس سے شہریوں کو گرمی سے نجات ملی۔
محکمہ موسمیات کے مطابق، لاہور میں بادل چھائے رہیں گے اور مزید بارش کا امکان ہے۔ کم سے کم درجہ حرارت 28°C جبکہ زیادہ سے زیادہ 36°C تک رہنے کی توقع ہے۔ ہوا میں نمی 70 فیصد اور ہوا کی رفتار 13 کلومیٹر فی گھنٹہ ریکارڈ کی گئی ہے۔
اس کے علاوہ، اسلام آباد، خیبرپختونخوا، بالائی پنجاب اور سندھ کے مختلف علاقوں میں بھی بارش کی پیشگوئی کی گئی ہے، جبکہ کشمیر اور گلگت بلتستان میں بھی گیلے موسم کا امکان ہے۔
